Astanaǵa týrıster aǵyldy: alty aıda 830 myń adam kelgen
ASTANA. KAZINFORM — Bıylǵy jyldyń alǵashqy jartyjyldyǵynda Astanaǵa shamamen 830 myń týrıst keldi. Bul ótken jyldyń sáıkes kezeńimen salystyrǵanda 12%-ǵa kóp. Onyń ishinde 187 myńǵa jýyǵy — sheteldik týrıster. Bul týraly Týrızm jáne sport mınıstrnligi málim etti.
Astana qalasy ákiminiń orynbasary Evgenıı Glotov elordada ótip jatqan Kazakhstan Travel Forum 2026 halyqaralyq týrıstik forýmynyń ashylýynda jyl saıyn elordaǵa 1,6 mıllıonnan astam týrıst keletinin aıtty. Onyń pikirinshe, orta eseppen qalaǵa keletin týrıster sany jyl saıyn 10–12%-ǵa artyp otyr.
Kazakhstan Travel Forum 2026 bıyl «Qaýipsiz týrızm» taqyrybyna arnalǵan. Forým memlekettik organdardyń, týrıstik bıznestiń, áýe kompanııalarynyń, qonaqúı ındýstrııasynyń, halyqaralyq uıymdar men salalyq qaýymdastyqtardyń ókilderin biriktirdi. Іs-shara aıasynda týrısterdiń qaýipsizdigi, salany damytý, kólik qoljetimdiligi, qyzmet kórsetý sapasy jáne memleket pen bıznestiń ózara is-qımyly máseleleri talqylanyp jatyr.
Búginde Astanada iskerlik, mádenı jáne medıtsınalyq týrızm qatar damyp keledi. Týrıster aǵynynyń artýyna baılanysty qala qonaqtarǵa arnalǵan usynystardy keńeıtýde: jańa týrıstik nysandar ashylyp, halyqaralyq qonaqúı brendteri tartylyp, iri mádenı, sporttyq jáne iskerlik is-sharalardyń kúntizbesi qalyptasyp keledi.
— Astana áldeqashan tek jumys babymen keletin qala bolýdan qaldy. Jyl saıyn elordaǵa 1,6 mıllıonnan astam týrıst keledi jáne bul kórsetkish orta eseppen jylyna 10–12%-ǵa ósip otyr. Búgingi mindetimiz — qonaqtyń Astanaǵa kontsertke nemese iskerlik kezdesýge kelip qana qoımaı, qalada uzaǵyraq aıaldap, keıin qaıta oralýyna jaǵdaı jasaý. Qazir álem qalalary dál osyndaı týrıst úshin básekege túsýde jáne Astana bul básekege belsendi qatysyp keledi, — dedi Evgenıı Glotov.
Shaharda týrızmdi damytý negizgi baǵyttardyń biri bolyp qala beredi. Іri halyqaralyq kontsertter, sporttyq jarystar, iskerlik jáne mádenı is-sharalar elordaǵa qosymsha týrıstik aǵyn tartýǵa jáne qonaqtardyń qalada bolý uzaqtyǵyn arttyrýǵa múmkindik beredi.
Týrıstik ınfraqurylym men oqıǵalyq kúntizbeni damytý Astananyń Qazaqstandaǵy jetekshi týrıstik ortalyqtardyń biri retindegi ornyn nyǵaıtýǵa jáne halyqaralyq týrıstik naryqtaǵy básekege qabilettiligin arttyrýǵa baǵyttalǵan.
Buǵan deıin Ulttyq statıstıka bıýrosynyń derekterine sáıkes, 2026 jyldyń birinshi toqsanynda qonaqúıler men demalys oryndarynda qyzmet kórsetken týrıster sany boıynsha Almaty qalasy kósh bastaǵanyn jazdyq. Bul kezeńde qalaǵa 472 930 týrıst kelgen. Ol jalpy týrıstik aǵynnyń 24,1 paıyzyn quraǵan.
Odan keıin Astana qalasy tur. Elordaǵa 352 243 týrıst kelgen, bul jalpy kórsetkishtiń 17,9 paıyzyna teń. Kóshbasshy óńirler qatarynda Aqmola oblysy (161 169 týrıst), Shymkent qalasy (139 443 týrıst) jáne Almaty oblysy (112 845 týrıst) bar.
