Astanaǵa tumaýdyń ekinshi tolqyny kele jatyr
ASTANA. QazAqparat - Astana qalasy densaýlyq saqtaý basqarmasy tumaý men JRVI-diń ekinshi tolqynyna baılanysty elorda turǵyndaryna daıyn bolýdy eskertedi, dep habarlaıdy QazAqparat.
Feısbýktegi resmı paraqshasynda qalalyq densaýlyq saqtaý basqarmasy aýrýdyń aldyn alý sharalaryn taǵy bir eske saldy. Dárigerler sýyq tıgizip alýdan saq bolýdy, adam kóp jınalatyn oryndarda uzaq bolmaýdy, durys tamaqtanýdy, belsendi ómir saltyn ustanýdy, taza aýada jıi serýendeýdi, tazalyq ustanýdy, bólme ishin kúnine 1-2 ret jýyp, aýasyn jıi keńeıtip otyrýdy eskertedi.
«JRVI aýrýyna shaldyqqan adamdarmen kóp aralasqan jaǵdaıda arnaıy medıtsınalyq maskany taǵýdy umytpaý qajet. Jyly bólmede kóp bolǵan kezde muryn qýysyn ylǵaldy oramalmen súrtý kerek. Epıdemııa kezinde dalaǵa shyǵar kezde murynǵa oksolın maıyn jaǵýdy da umytpańyzdar. Sonymen qatar aıazdy kezeń bastalmaı turyp, bir aı buryn tumaýǵa qarsy ekpe jasatý usynylady», - delingen habarlamada.
Onyń ústine balalarǵa jiti kóńil bólýdi, aýyryp qalǵan jaǵdaıda naqty dıagnostıka jasatý maqsatynda dárigerge kórsetken jón, sebebi JRVI belgilerine uqsas ózge de qaýipti aýrýlar bar. Tumaýratqan adamdardan aıaǵy aýyr jáne qart adamdardy alys ustaǵan durys.
