Astanaǵa Shymkentten kerýen kele jatyr
ASTANA. 19 qyrkúıek. QazAqparat - Búgin Shymkent qalasyndaǵy ortalyq ıppodrom mańyndaǵy alańda Ońtústik Qazaqstan oblysynyń aýyl sharýashylyǵy ónimderi tıelgen júk kólikteri kerýeni Astana qalasyna qaraı jolǵa shyqty.
Bul týraly Ońtústik Qazaqstan oblysy ákimdiginiń baspasóz qyzmetinen habarlandy.
«Bul joly ońtústikqazaqstandyq dıqandar Astana qalasyna 72 mln teńgege jýyq qarjynyń ónimderin alyp kelýdi josparlap otyr. Arnaıy jármeńke úshin attandyrylǵan kerýende jalpy ettiń 5 túrinen 50 tonna, sút ónimderinen 8 tonna, kókónisten 58 tonna, kartoptan 15 tonna, baqsha ónimderinen 63 tonna, jemisten 37 tonna jáne 36 tonna basqa da túrli ónimder bar. Bulardyń barlyǵy elorda alańynda naryqtaǵy bazar qunynan 20 paıyzǵa deıin arzandatylǵan baǵamen satylady», - delingen baspasóz aıǵaǵynda.
Aýyl sharýashylyǵy ónimderi tıelgen kólik kerýenin Ońtústik Qazaqstan oblysy ákiminiń birinshi orynbasary Berik Ospanov shyǵaryp salyp, sát sapar tiledi. Eske sala ketsek, dástúrli kúzgi jármeńke Astana qalasynyń ortalyq alańynda 22-23 qyrkúıek kúnderi ótedi
