Astanaǵa Shyǵys Qazaqstannan 60 tonna et pen 30 tonna bal ákelindi
ASTANA. 21 jeltoqsan. QazAqparat - Búgin Astanada Shyǵys Qazaqstan oblysynyń aýylsharýashylyq jármeńkesi ótýde.
Aýylsharýashylyq jármeńkesinde shyǵystyń brendtik taýarlary - bal jáne panty ónimderin satyp alýǵa bolady. Munda barlyǵy 120 shatyr tigilip, olarda et pen sút, shujyq, bal, jarma ónimderi, ósimdik maıy, ulttyq taǵamdar: qymyz, tary, qurt molynan saýdalanyp jatyr.
«Jyldyń aıaǵynda elimizdiń taǵy bir aımaǵy Astanaǵa tartý jasady. Ózderińiz bilesizder, el aımaqtary kúz aılarynda kerýen tartyp, elordaǵa keletini bar. Bul jaqsy dástúrge aınalǵan edi. Endi mine, Jańa jyldyń qarsańynda bizdiń eń iri aımaqtarymyzdyń biri - Shyǵys Qazaqstan óziniń mádenı kúnderin ótkizip, án-shashýyn tartý ete otyryp, ekinshi jaǵynan osyndaı ádemi jármeńke ótkizýde. Oblystyń barlyq 18 aýdany ózderiniń ónimderin astanalyqtarǵa syılap jatyr. Orta eseppen alǵanda qaladaǵy bazarlarmen salystyrǵanda ónimder 20 paıyzǵa tómen. Munda et ónimi, balyq, bal jáne sút taǵamdary ákelingen», - dedi Astana ákimi Imanǵalı Tasmaǵambetov jármeńkeniń ashylýynda.
Aıta keteıik, Shyǵys Qazaqstan oblysy bıyl ekinshi ret osyndaı jármeńke uıymdastyrýda.
Atalmysh jármeńkege oblystyń eki qalasy men 16 aýdanynan Astanaǵa 30 tonnadan astam bal, 57 tonna iri qara men qoı eti, 2 tonna qus eti, 3 tonna sút ónimderi, 12 tonna ósimdik maıy, 6,5 tonna shujyq ónimderi, 6 tonnadan astam jarma túrleri, 4 tonnaǵa jýyq balyq, 6 tonna qymyz, 1,5 tonna panty ónimderi, 2 tonna nan-toqash, kondıterlik taǵamdar, un jóneltilgen.
