Astanaǵa S.Bezrýkovtyń teatry keldi
ASTANA. 26 maýsym. QazAqparat - Astanaǵa Reseıdiń eńbek sińirgen ártisi, tanymal akter Sergeı Bezrýkov keldi. Elordanyń 15 jyldyǵyna oraı ol jáne onyń shyǵarmashylyq ujymy Kongress-holl sahnasynda óner kórsetpek. Osyǵan oraı, búgin ártistiń qatysýymen baspasóz máslıhaty ótti.
Bıyl S.Bezrýkovtyń teatry «Sırano de Berjerak» spektaklin alyp keldi. Oqıǵa jelisi boıynsha daryndy aqyn Sırano de Berjerak Roksana esimdi arý qyzǵa ǵashyq bolady. Alaıda óz sezimi týraly tis jaryp aıtpaıdy. Sosyn jaqyn dosy Krıstıannyń atynan Roksanaǵa óleń joldaryn arnap, óz sezimin bildiredi. Ýaqyt óte kele, Roksana Krıstıanǵa yntyq bolady. Biraq ol kóp uzamaı, soǵysta qaza tabady. Sonda da Sırano ishki sezimin qupııada ustap, barlyq óleńderdi ózi jazǵanyn aıtpaıdy. Degenmen, spektakldiń sońynda Roksana Sıranoǵa ǵashyq bolyp, «Men de seni súıemin!», - dep óz sezimin bildiredi. Sol kezde Sırano onyń qolynda qaıtys bolady. «Iá, spektakl dál solaı aıaqtalady. Baqyt degen osy emes pe?! Kesh bolsa da, Sırano Roksananyń «Men seni súıemin!» degen sózin estip ketedi. Ómir baqı ony estimeı, ómir súrgenshe, bir ret estip, o dúnıelik bolyp ketken artyq emes pe?!», - deıdi S.Bezrýkov. Spektakldiń rejısseri - S.Bezrýkov. Bas keıipkeri de - ózi. Spektakl 5 aktiden turady. Uzaqtyǵy - 4 saǵat. Al janry - qaharmandyq komedııa.
Aıta keteıik, S.Bezrýkovtyń teatry Astanada birneshe kún aıaldap, 27-28 maýsym kúnderi Kongress-holl saraıynda «Sırano de Berjerak» spektaklin qoıatyn bolady.
