Astanaǵa «Oskar» syılyǵynyń ıegerleri kelmek

ASTANA. QazAqparat - «Eýrazııa» kınofestıvaliniń prezıdenti Aıman Musaqojaeva 1-5 shilde aralyǵynda ótetin kezekti kıno kúnderine daıyndyq jumystaryn aıtyp berdi, dep habarlaıdy QazAqparat tilshisi.

«Bıyl Eýrazııa kınofestıvali 20-shy ret uıymdastyrylady. Bul ataýly shara Astana men Qazaq ulttyq óner ýnıversıtetiniń 20 jyldyǵyna oraılastyrylǵan. Ótken jyly Oskar ıegerleri - Nıkolas Keıdj, Edrıan Broýdı, Djon Malkovıch syndy Gollıvýd juldyzdary kelgen bolatyn. Bıyl da olardan kem túspeıtin juldyzdardy shaqyramyz», - dedi Aıman Musaqojaeva Mádenıet jáne sport mınıstrliginde ótken baspasóz máslıhatynda.

Onyń aıtýynsha, qazirgi ýaqytta qazylar alqasy men qurmetti qonaqtar tizimi jasalyp jatyr.

«1-5 shilde kúnderi bizdiń kınofestıvalge qatysýǵa ýaqyt taba alatyn tanymal akterlarmen jáne rejısserlermen kelissózder júrip jatyr. Festıvalde júzden astam kınolenta tanystyrylymy ótedi. Otandyq fılmder arasynan Ermek Tursynovtyń «Kınomehanık» fılmi jáne ózge de týyndylar kórsetiledi», - dep óz sózin tolyqtyrdy A. Musaqojaeva.

Kınofestıval «Chaplın» kınoteatry bazasynda jáne jaqyn mańdaǵy qonaq úılerde ótedi. Jabylý saltanaty «Qazaqstan» ortalyq kontsert zalynda uıymdastyrylady.

Halyqaralyq «Eýrazııa» kınofestıvali 1998 jyly Qazaqstanda ashyldy jáne FIAPF (Halyqaralyq kınoprodıýserler qaýymdastyǵy federatsııasy - avt.) akkredıtatsııasynan ótken. Bedeldi brıtandyq basylym International FilmGuide «Eýrazııa» kınofestıvalin álemniń 35 tanymal kınofestıvali qataryna engizgen.