Astanaǵa Maıkl Djeksonnyń horeografy Poppın Pıt keldi
ASTANA. 5 shilde. QazAqparat - Búgin Astanada qala kúnine oraı «Kóshe bıi» halyqaralyq festıvali ótedi.
Oǵan TMD elderinen jáne Qazaqstannyń barlyq óńirlerinen 400-den astam bıshiler kelgen. Festıvalǵa qatysýǵa Frantsııa, Koreıa jáne AQSh elderiniń bıshileri qonaqqa shaqyryldy.
Olardyń qatarynda sharanyń qurmetti qonaqtary jáne tórelik etýshilerdiń qatarynda Popping stıliniń negizin qalaýshy, Maıkl Djekson, Djanet Djekson, Djastın Tımberleık sekildi juldyzdardyń horeografy, Krıs Braýn men The Black Eyed Peas tobynyń klıpterinde túsken bıshi Poppın Pıt, ataqty Krıs Braýn, Tonı Brekston, Ýeın Bredı, Kassı Devıs, Boddı Valentıno syndy ánshilerdiń jáne Pussycat Dolls tobynyń beıneklıpterinde túsken, kóptegen halyqaralyq jarystardyń júldegeri Maıkl Dýo, sonymen qatar Djastın Bıber, Pınk syndy tanymal ánshilerdiń súıikti bıshisi, halyqaralyq jarystardyń jeńimpazy Adja Djordj jáne taǵy basqalary bar.
«Eń basty maqsatymyz - bıdiń batl, haýz, hıp-hop syndy túrlerin damytý, Qazaqstandaǵy kóshe bıleriniń tanymaldyǵyn arttyrý», - deıdi festıvaldiń uıymdastyrýshysy Nursultan Táshenov.
Onyń aıtýynsha, jarys batl, hıp-hop, bakıng, popıng jáne haýz atalymdary boıynsha ótedi. Jarystyń jalpy júlde qory 2,2 mln. teńgeni qurap otyr. Eń basty «Komandalyq hıp-hop shoý» atalymynyń jeńimpazdaryna júldeniń negizgi bóligi - 1 mln. teńge beriledi.
«Bıyl biz festıvalǵa birneshe jańa syılyqtardy taǵaıyndadyq. Sonyń biri - «Prodıýser kýbogi». Ol júldege ilikpeı qalǵan, alaıda áleýeti zor bıshige nemese horeografqa tabystalady. Sonymen qatar «Jyl bıshisi» syılyǵy jyl boıy el namysyn halyqaralyq arenalarda sátti qorǵap kelgen eń úzdik bıshige beriledi», - dep túıdi sózin N.Táshenov.
