Astanaǵa qubyrmen jetkiziletin gaz tarıfi kómir men suıytylǵan gazdan da qymbat bolmaq

ASTANA. QazAqparat - Astanaǵa qubyr arqyly jetkiziletin gazdyń tarıfi kómir men suıytylǵan gazdan da qymbat bolaıyn dep tur. Bul týraly búgin QR Úkimetindegi baspasóz máslıhatynda elimizdiń Energetıka mınıstri  Qanat Bozymbaev málim etti, dep habarlaıdy QazAqparat.

«Astanany gazdandyrýdyń tehnıkalyq-ekonomıkalyq negizdemesi «QazTranGaz» kompanııasymen jasaldy.  Sodan keıin  saraptamaǵa jiberilip, ol da aıaqtaldy. Jalpy  aıtqanda uzyndyǵy 1,8 myń  shaqyrym gaz qubyry Qyzylorda oblysynan Jezqazǵanǵa, odan Qaraǵandy, Temirtaý arqyly Astanaǵa jetkiziledi. Ekinshi kezeńde Kókshetaý men Petropavlǵa tartylady. Osyndaı joba bar», - dedi ol.

Biraq mınıstr bul jobanyń qazirgi ýaqytta  talqylanyp jatqandyǵyn basa aıtty.

«Óıtkeni Astanada sońǵy tarıf óte joǵary bolaıyn dep tur. Ony kómirmen nemese suıytylǵan gazben salystyrsaq tarıfi óte joǵary bolady. Bul máseleden qalaı shyǵý joldaryn «QazTransGazben», ákimdikpen talqylap jatyrmyz. Osy aıdyń qorytyndysyn shyǵarǵan kezde dál osy máselege qatysty taǵy da aıtamyz», - dedi Bozymbaev.