Astanaǵa kólikpen kirý úshin qaı saǵattar aqyly bolady
ASTANA. QazAqparat - Astana ákimdigi qaýyrt ýaqytta qalaǵa kirýge aqy alý júıesin engizý máselesine qatysty túsinikteme berdi, dep habarlaıdy QazAqparat tilshisi.
«Búginde elordada avtomobıl sany artyp kele jatyr. Astanada shamamen 500 myń kólik quraly bar. Olardyń 324 myńy tirkelse, 80 myńnan astamyn syrttan keletin kólikter quraıdy. Al qalǵan kólikter - bular ózge óńirlerde tirkeýge alynǵan, biraq, ıeleri elordada turady. Sondyqtan bizdegi deńgeı óte joǵary, kólik quraldaryn jan basyna esepteıtin bolsaq Londonǵa jaqyndap qaldy. Sol sebepti qoǵamdyq kólik salasyn jaqsartý jáne kóshe jelileriniń júktemesin tómendetý úshin birqatar shara qabyldanýda. Onyń biri qalanyń 6 núktesine kirýdi aqyly jasaý josparlanǵan», - dedi «Astana LRT» JShS basqarmasy tóraǵasynyń orynbasary Beıbit Esjanov elorda ákimdiginde ótken baspasóz máslıhatynda.
Onyń túsindirýinshe, aqyly kirý qaýyrt ýaqytqa eseptelgen. Máselen, tańerteńgi saǵat 7-00-den 9-00-ge deıin jáne keshkisin 17-30-dan 20-00-ge deıin aralyqty qamtıdy.
«Aqyly kirýdi engizýdiń máni mynada, búginde kún saıyn 82 myńnan astam kólik qalaǵa kiredi jáne kóshe-jol jelisine júkteme shamamen 17 paıyzdy quraıdy. Eger qaýyrt ýaqytta aqyly kirýdi engizetin bolsaq, halyqtyń kópshiligi qoǵamdyq kólikke minedi dep oılaımyz. Qazirgi ýaqytta bizde 16 qala mańyzy baǵdary bar, qozǵalys ara qashyqtyǵy 4 mınýtty quraıdy. Sondyqtan qala mańynda turatyn turǵyndardyń jaıly saparyn qamtamasyz etý úshin qajetti barlyq sharalardy júzege asyramyz», - dedi ol.
Osy rette B.Esjanov qala kirý úshin kólik ıelerinen alynatyn aqynyń shamamen qansha bolatyndyǵyn aıta almady. Degenmen, ol aqyly kirýdi engizý qala kóshelerindegi júktemeni 15-20 paıyzǵa tómendetetindigine senimdi ekendigin jetkizdi.
