Astanaǵa kireberiste onnan astam urlyqqa qatysy bar qylmyskerler mingen avtokólik ustaldy - JPB
ASTANA. 10 aqpan. QazAqparat - Jol polıtsııasy qyzmetkerleri Astanaǵa kireberistegi «Rýbej» beketinde onnan astam qylmysqa qatysy bar qylmyskerler mingen avtokólikti ustady.
Jol polıtsııasy basqarmasynan habarlaǵandaı, 6 aqpan kúni tús aýa «Rýbej» beketinde jol polıtseıleri - aǵa leıtenant Andreı Ermılov, serjant Elýbaı Aqparov pen qalalyq ІІD kınology Astana qalasynyń 24 jastaǵy turǵyny basqaryp kele jatqan «BMV-525» mashınasyn toqtatty.
Kóliktiń salonyn tintý barysynda, artqy oryndyqtaǵy shyntaq astyna qoıylatyn qurylǵynyń ishinen sary altynnan jasalǵan zergerlik buıymdar, atap aıtqanda - bir bilezik, brosh, úsh moıyn tumar, syrǵa, 29 alqa men 18 júzik tabyldy.
Júrgizýshi sol orynda quryqtaldy, al onyń 26 jastaǵy jolaýshysy jol-jónekeı mashınamen izin sýytpaq boldy. Artynan qýǵan E.Aqparov qylmyskerge uzaq ketýge múmkindik bermedi.
Ustalǵandar ІІD-ge jetkizildi. Polıtseıler ustalǵan azamattar men BMV kóligi Aqmola oblysynyń Aqkól aýdany men Kókshetaý qalasynda jasalǵan, sondaı-aq Astanada bolǵan 12 qaraqshylyq oqıǵasyna qatysy barlyǵyn anyqtady.
