Astanaǵa kireberis joldarda jeke kólikten qoǵamdyq kólikke aýysyp minetin beketter salynady
ASTANA. QazAqparat – Astanaǵa Qaraǵandy, Pavlodar, Kókshetaý, Qostanaı, Qorǵaljyn baǵytynan jáne ońtústik baǵyttan kiretin magıstraldyq joldardyń bárinde jeke kólikten qoǵamdyq kólikke aýysyp minetin beketter salynady, dep habarlaıdy QazAqparat tilshisi.
Bul týraly Astana qalasy Sáýlet jáne qala qurylysy, jer qatynastary basqarmasy basshysy orynbasary Aıan Smaǵulov redaktsııa saýalyna joldaǵan jaýabynda aıtty.
«Kólik-transplantatsııalaý toraptary syrtqy jáne qala mańyndaǵy áýejaı, temirjol vokzaldary men avtobýs vokzaldarynyń júrdek qalalyq relsti kólikpen (LRT, temir jol, tramvaı) ózara is-qımyl toraptary negizinde qalyptastyrylady. Astananyń bas josparynda bular «iskerlik ortalyqtar» dep ataldy. Atalmysh iskerlik ortalyqtardyń quramynda aıaldama pýnktteri, avtoturaqtar, velostantsııalar, elektromobılderge arnalǵan stantsııalar bolady. Bas josparda qalaǵa Qaraǵandy, Pavlodar, Kókshetaý, Qostanaı, Qorǵaljyn jáne ońtústik baǵyttaǵy barlyq negizgi magıstraldyq avtojol kireberisteri boıynsha, sondaı-aq halyqaralyq áýejaıda jáne «Astana» jáne «Nurlyjol» qoldanystaǵy eki temirjol vokzalynda 9 negizgi kólik-transplantatsııalaý toraby belgilengen», - dep jazylǵan basqarma jaýabynda.
Aıan Smaǵulovtyń aıtýynsha, áýeli kólik aýystyryp minetin toraptar tikeleı ornalastyrý «K-3» dep atalatyn qalaishilik saqına kontýry boıynsha josparlanǵan. Biraq keıin ol jospar túzetilip, qalaǵa kiretin negizgi joldardyń bárin qamtıdy degen sheshim qabyldanyp otyr.
