Astanaǵa kelgen Tájikstan Prezıdentin Qazaqstan Premer-Mınıstri kútip aldy

ASTANA. QazAqparat - Tájikstan Respýblıkasynyń Prezıdenti Emomalı Rahmon aldaǵy kúnderi josparlanǵan birqatar iri sharaǵa qatysý úshin elimizge keldi, dep habarlaıdy QazAqparat Úkimettiń resmı saıtyna silteme jasap.

Asa mártebeli qonaqty elorda áýejaıynda QR Premer-Mınıstri Álıhan Smaıylov qarsy aldy.

Tájikstan Prezıdenti Azııadaǵy ózara is-qımyl jáne senim sharalary jónindegi VI sammıtke, TMD memleket basshylary keńesiniń otyrysyna jáne «Ortalyq Azııa – Reseı» sammıtine qatysady.

Aıta keteıik, 12-13 qazanda Astanada Azııadaǵy ózara is-qımyl jáne senim sharalary jónindegi keńestiń VI sammıti ótedi, oǵan barlyǵy 50-ge jýyq delegatsııa qatysady.

14 qazanda elordada TMD memleket basshylary keńesiniń otyrysy ótedi, onyń aıasynda uıym qyzmetiniń negizgi máseleleri talqylanady. Otyrysqa Ázerbaıjan, Armenııa, Belarýs, Qazaqstan, Qyrǵyzstan, Reseı, Túrikmenstan, Tájikstan jáne Ózbekstan basshylary qatysady.

Sonymen qatar 14 qazanda Astanada «Ortalyq Azııa – Reseı» sammıti ótedi. Onda saýda, mádenıet, qaýipsizdik jáne t.b. salalardaǵy óńirlik yntymaqtastyq máseleleri talqylanady.

Foto: t.me/KZgovernment