Astanaǵa kelgen sheteldik teatrlar tegin qoıylymdarǵa shaqyrady
ASTANA. QazAqparat - Astanada «SAMGAU» VI halyqaralyq teatr festıvaliniń shymyldyǵy ashyldy, dep habarlaıdy QazAqparat qalalyq Mádenıet jáne sport basqarmasyna silteme jasap.
Bir apta boıy qaladaǵy teatrlar sahnasynda Qazaqstan óńirleri men taıaý shetelden kelgen teatrlar óner kórsetpek.
«Alty jyl buryn Qýanyshbaev teatrynyń irgesinde osy festıvaldiń tusaýy kesilgen bolatyn. Ony halyqaralyq deńgeıge jetedi dep eshkim oılamaǵan. Bıylǵy festıvaldiń ataýy da, mazmuny da ózgeshe. Buryn ol «Sahnadan sálem» dep atalyp kelgen edi. Biz nomınatsııalar belgilep, qatysýshylardy materıaldyq turǵydan qoldaý týraly sheshim qabyldadyq. Festıvaldiń bas júldesi - 2 mıllıon teńge», - dedi teatr jáne kıno rejısseri, dramatýrg Talǵat Temenov teatr aptalyǵynyń ashylýyna arnalǵan baspasóz maslıhatynda.
Onyń aıtýynsha, «SAMGAU» festıvaline qatysýǵa 53 ujym ótinim bergen, onyń ishinen tek 12-si ǵana tańdap alynǵan.
«Búginde teatr ónerine suranys joǵary. Eger 5 jyl buryn teatr álemi turalap tursa, sońǵy 3-4 jylda aıtarlyqtaı serpin jasaldy. Jańa sapaly qoıylymdar kóp, sondyqtan irikteý qatań túrde júrgizildi. Ázirge ýaqyttyń tyǵyzdyǵynan qatysýshylardy kóbirek ala almaımyz. Qazylar alqasy kúnine 3 spektaklden kóredi. Óıtkeni festıval bir aptaǵa ǵana sozylady», - dep tolyqtyrdy ol.
Sonymen qatar, belgili professorlar, teatr óneriniń sańlaqtary kún saıyn festıval qatysýshylaryna vokal, sahnada qozǵalý, sóıleý jáne akterlik sheberlik boıynsha sheberlik dáristerin ótkizedi.
Bıylǵy festıvaldiń taǵy bir ereksheligi - oǵan OFF-baǵdarlama retinde Qazaq ulttyq óner ýnıversıtetiniń akterlik óner jáne rejıssýra kafedrasynyń stýdentteriniń dıplomdyq spektaklderi de qatysady.
Atalmysh fetıval aıasynda halyq nazaryna usynylatyn qoıylymdardyń tizimin buǵan deıin usynǵan bolatynbyz. Kirý - tegin.
