Astanaǵa keletin Úndistan boksshylarynyń esimi belgili boldy
ASTANA. 1 naýryz. QazAqparat – 4-13 sáýir aralyǵynda Astanada ótetin bokstan Olımpıadalyq irikteý synyna qatysatyn Úndistan boksshylarynyń esimi belgili boldy.
Bul týraly úndistandyq «Deli Sport» gazetiniń menshikti tilshisi Sınh Loýd «Alamanǵa» arnaıy habarlady.
Úndistan quramasy Astana tórine 6 boksshy ákelmek. 52 kelide Olımpıada joldamasyna Meh Sýranjoý talasady. Al 56 kelide 18 jasar Chıva Thapa kelmek. Ol 2009 jyly Erevanda ótken jasóspirimder arasyndaǵy Álem chempıonatynyń qola júldegeri. Sıngapýrdegi jasóspirimder arasyndaǵy olımpıada oıyndarynyń qatysýshysy.
75 kelide úndi boksynyń kóshbasshysy Vıjender Sınh kelmek. Ol – Gýanjoýdaǵy Azııa oıyndarynyń chempıony, Beıjiń olımpıadasynyń jáne Mılandaǵy Álem chempıonatynyń qola júldegeri.
Al 91 kelide Vıjenderdiń baýyry Manpreet Sınh lıtsenzııaǵa talasady. 81 kelide Sýmıt Sangvan Astanaǵa at basyn burmaq. Bul eki boksshynyń aıtarlyq jetistikteri joq. Asa aýyr salmaqta 2010 jylǵy Azııa oıyndarynyń qola júldegeri Paramjeet Samota Úndi eliniń namysyn qorǵaıdy.
Qazir Úndistan quramasynda Londonnyń 3 joldamasy bar. Al lıtsenzııalyq dodaǵa qatysatyn qazaq boksshylarynyń esimi naýryzdyń sońynda belgili bolady.
