Astanaǵa «Qazaqstan ańyzdary» ǵylymı-tanymdyq avtokólik ekspedıtsııasy kelip jetti

«Ekspedıtsııa 4 myńǵa jýyq shaqyrym jol júrip ótti. Bul Qazaqstannyń shyǵys bóligi, Almatydan bastadyq, Jarkent, Arasan, Alakól, Zaısan, Marqakól, Rahman bulaǵy, Abaı atamyzdyń týǵan jeri Jıdebaı arqyly Astana qalasyna jetip otyrmyz. Bul marshrýtymyz 12 myń shaqyrym jerge barady. Onyń boıynda biz elimizdiń tarıhyn, tabıǵatyn, arheologııalyq eskertkishterin, mádenı muralaryn zertteıtin bolamyz. Sonymen qatar Qazaqstannyń ishki týrızmin damytý maqsatynda týrıstik tizilim jasaýǵa bel býyp otyrmyz», - deıdi Abaı atyndaǵy Qazaq ulttyq pedagogıkalyq ýnıversıteti geografııa-ekologııa fakýltetiniń dekany Ordenbek Nazbaev.

Eske sala keteıik, 2012 jyldyń 17 qyrkúıeginde Almatydan «Qazaqstan ańyzdary» avtoekspedıtsııasy attanǵan bolatyn. Ekspedıtsııa marshrýty Qazaqstan tabıǵatynyń kórikti de ǵajaıyp óńirleri arqyly ótip, jalpy qashyqtyǵy 12 myń shaqyrym shamasyn quraıdy. Avtojoryqty uıymdastyrǵan Qazaq Geografııalyq Qoǵamy, Volkswagen saýda markasymen shyqqan Kompanııa MERCUR AUTO jáne Kino Park kınoteatrlar tizbegi.

O. Nazbaevtyń aıtýynsha, joryq uıymdastyrýshylary áýel basta gazet, kitap, albom men jýrnaldar arqyly qazaqstandyqtarǵa, sheteldikterge Qazaqstannyń kórikti ekendigin, Qazaqstandy Eýrazııanyń kindik tusynda ornalasqan tarıhy mol, mádenıeti zor halyq ekendigin kórsetýdi oılastyrǵan.

Qazirgi ýaqytta ekspedıtsııa aldynda áli 9 myń shaqyrymdyq jol bar.   

Joryq aıaqtalǵannan keıin, onda túsirilgen fılm KINOPARK kınoteatrlar tizbegi boıynsha búkil Qazaqstan aımaqtarynda kórsetiledi. Ekspedıtsııa nátıjeleri negizinde ótken jol egjeı-tegjeıleri men erekshelikterin jáne baǵdar boıyn sıpattaıtyn fotoalbom ázirlenedi.