Astanaǵa qatysty jalǵan bomba habarynyń avtory Ýkraınada ustaldy
ASTANA. KAZINFORM — Ýkraınada Astanadaǵy saýda-oıyn-saýyq ortalyqtarynyń birine jarylǵysh zat qoıylǵany týraly kórineý jalǵan habarlama jiberdi degen kúdikpen kámeletke tolmaǵan jasóspirim ustaldy. Bul týraly Qazaqstan Іshki ister mınıstrligi habarlady.
Oqıǵa 26 tamyzda Sýmy qalasynda bolǵan. Jasóspirim Qazaqstandaǵy saýda-oıyn-saýyq ortalyqtarynyń birinde jarylǵysh zat jasyrylǵany týraly jalǵan habarlama jibergen. Ony Qazaqstan ІІM men Ýkraına kıberpolıtsııasynyń ózara is-qımyly nátıjesinde anyqtap, ustaǵan.
— Tintý kezinde kúdiktiden uıaly telefondar, planshet, noýtbýk, júıelik blok jáne bank kartasy tárkilendi. Elektrondyq qurylǵylardy tekserý barysynda habarlama jiberilgen akkaýnt, onyń mátini jáne iske qatysty ózge de tsıfrlyq dáleldemeler anyqtalǵan. Qazir tárkilengen tehnıkalarǵa taldaý júrgizilip jatyr, — dep habarlady Qazaqstannyń Іshki ister mınıstrligi.
Quqyq qorǵaý organdary yqtımal sybaılastardy anyqtap, ustalǵan jasóspirimniń osyǵan uqsas basqa da faktilerge qatysy bar-joǵyn tekserip jatyr. Qazaqstannyń ІІM men Ýkraınanyń quzyrly organdary odan ári protsestik sheshimder qabyldaý boıynsha jumysty jalǵastyrady.
ІІM nysandy jarý, terrorızm jasaý, kepilge adam alý jáne qaýipsizdikke tónetin ózge de qaterler týraly jalǵan habarlamalar úshin zań boıynsha jaýapkershilik qarastyrylǵanyn eskertti.
Eske salaıyq, buǵan deıin Petropavlda mektepke jarylǵysh zat qoıyldy dep «ázildegen» jasóspirim sottalǵan edi.
