Astanaǵa qarap ózimizdiń jumysymyzǵa baǵyt-baǵdar alamyz - Saparbaev

AQTÓBE. QazAqparat - Aqtóbede Astana kúnine oraı «Araıly Aqtóbeden, bas qala Astanaǵa» atty merekelik shara ótti. Oblys ákimi Berdibek Saparbaev aqtóbelikterdi merekemen quttyqtady, dep habarlaıdy QazAqparat tilshisi.

Aqtóbe qalasyndaǵy saıabaqtar men demalys oryndarynda mádenı, sporttyq sharalar ótti. Astana kúnine arnalǵan merekelik baǵdarlama aıasynda óńir basshysy Berdibek Saparbaev qala turǵyndary men qonaqtary merekemen quttyqtady.

«Astanany dúnıejúzi tanydy, moıyndady. Astana barlyq halyqaralyq standarttarǵa, talaptarǵa saı memlekettiń ortalyǵy boldy. Onyń aıǵaǵy sońǵy kezderdegi Astanada ótip jatqan saıası-ekonomıkalyq, mádenı-áleýmettik is sharalar. Osynyń barlyǵy - Astananyń negizin qalaýshy, arhıtektory, memleket basshysy Nursultan Nazarbaevtyń arqasynda. Biz, óńirler, Astanaǵa qarap ózimizdiń jumysymyzǵa baǵyt-baǵdar alamyz. Astana sııaqty bolǵymyz keledi. Árbir qazaqstandyq Astananyń damýyna, ósýine óz úlesin qosýy kerek. Aqtóbelikter de Astananyń ósýine, órkendeýine óz úlesin qosyp keledi. Jaqynda ǵana Astana qalasynda Aqtóbe kúnderi ótti. Keshe, búgin óndiris oryndary, áleýmettik nysandar iske qosyldy. Osynyń barlyǵy Astana kúnine arnalǵan tartý. Biz, qazaqstandyqtar, Astanamen maqtanýymyz kerek, Astana úshin barlyǵymyz qyzmet etýimiz kerek»,- dedi óńir basshysy Berdibek Saparbaev.

Astana kúnine arnalǵan merekelik shara kezinde óńir ekonomıkasyn damytýǵa, áleýetin kóterýge úles qosqan eńbek adamdary marapattaldy.