Astanaǵa gaz tartý jobasynyń tehnıkalyq ekonomıkalyq negizdemesin ázirleý jumystary qaıta bastalady
ASTANA. QazAqparat - Elimizdiń Energetıka mınıstrliginde QR Premer-Mınıstri Kárim Másimovtiń tapsyrmasy boıynsha Qazaqstannyń gaz ónerkásibin damytý máseleleri jónindegi vedomstvoaralyq jumys tobynyń otyrysy ótti, dep habarlady vedomstvonyń baspasóz qyzmetinen.
Jınalysta gaz salasyndaǵy barlyq mańyzdy jáne jekelegen máseleler boıynsha tıisinshe naqty sheshimder qabyldandy. Taýarlyq gazǵa baǵa belgileý tetigin jetildirý boıynsha usynys engiziletin bolady.
«QazMunaıGaz» UK» AQ, «QazTransGaz» AQ tabıǵı gazdy satý baǵasyn dollar valıýtasynan ulttyq valıýtaǵa aýystyrý jóninde «Teńizshevroıl» JShS-men kelissózderdi jalǵastyrady.
«Saryarqa» gaz qubyry magıstralin salý jobasynyń (Astanany «Beıneý-Bozoı-Shymkent» magıstraldi gaz qubyrynan: «Qaraózek» (Qyzylorda) kompressorlyq stansasy-Jezqazǵan-Qaraǵandy-Temirtaý-Astanamarshrýty boıynsha) tehnıkalyq ekonomıkalyq negizdemesin ázirleý (memlekettik taldaýmen qosa alǵanda) jumystary qaıta bastalady.
«QazTransGaz» AQ jáne «General Electric» kompanııalary oblys ákimdikterimen birlesip, eldi mekenderdi gazdandyrý úshin ilespe tabıǵı gazdyń jańa tehnologııasyn paıdalaný múmkindikteriniń keshendi josparyn ázirleýdi bastaıdy.
Sonymen qatar oblystardyń jáne Almaty qalasynyń ákimdikteri jáne «QazTransGaz» AQ 2040 jylǵa deıin gazdy paıdalanýdyń naqtylanǵan boljamyn qurady. Al QR munaı óndirýshi kompanııalary 2040 jylǵa deıin bólip kórsetilgen gazdyń boljamdy teńgerimin eseptep jatyr.
Munaı óndirýshi kompanııalardyń jáne jergilikti atqarýshy organdardyń tabıǵı gazdy paıdalaný jónindegi derekteri negizinde Energetıka mınıstrligi 2040 jylǵa deıingi gazdyń uzaq merzimdi boljamdy teńgerimin ázirleıdi.
«QazTransGaz» AQ Qaraǵandy oblysynyń ákimdigimen birlesip, Qaraǵandy kómir alabynyń kómir qabattarynan metan óndirý jobasyn iske asyrýdy jalǵastyrady.
QR Energetıka mınıstrligi «QazMunaıGaz» UK» AQ, «QazTransGaz» AQ-pen birlesip, QHR-ǵa Reseıdiń gazyn tasymaldaý jáne QHR-ǵa Qazaqstan gazyn eksporttaý máselelerin pysyqtaý jumystaryn jalǵastyrady.
