Astanaǵa gaz tartý úshin qarajat izdestirilip jatyr

ASTANA. QazAqparat - Astanany gazdandyrý jobasy boıynsha naqty sheshim qabyldanbady. Bul týraly Ortalyq kommýnıkatsııalar qyzmetindegi baspasóz máslıhatynda QR Energetıka vıtse-mınıstri Maǵzum Myrzaǵalıev málim etti, dep habarlaıdy QazAqparat.

«Astana turǵyndary úshin bul másele óte ózekti. Búginde atalǵan joba boıynsha tehnıkalyq-ekonomıkalyq negizdeme aıaqtaldy. Ózderińiz bilesizder, elordaǵa gaz tartýda birneshe baǵdar qarastyrylǵan bolatyn, ıaǵnı osyǵan deıin Qostanaı oblysanan Kókshetaý arqyly Astanaǵa gaz qubyryn jetkizý pysyqtalǵan edi. Keıinnen Qyzylorda oblysynan Qaraǵandy, Temirtaý arqyly elordaǵa deıin tartý qarastyryldy. Jobanyń quny 200 mlrd teńgeden asyp otyr, ıaǵnı bul gaz qubyry arzanǵa túspeıtini anyq. Bul turǵyda biz tek magıstraldy jeliniń qurylysy týraly aıtyp otyrmyz. Budan bólek,gaz qubyry jolyndaǵy árbir eldi mekendi gazdandyrý da qomaqty qarjyny talap etetin bolady»,-dep toqtaldy vıtse-mınıstr.

Osy oraıda ol bul gaz qubyry boıynsha naqty sheshim qabyldanbaǵanyn atap ótti.

«Qazirgi kezde túrli qarjylandyrý kózderin tartýdyń máseleleri zerdelenip jatyr», - dedi M. Myrzaǵalıev.