Astanaǵa gaz qubyryn tartý josparǵa sáıkes aıaqtala ma

ASTANA. QazAqparat - Bıylǵy jeltoqsan aıynda «Saryarqa» gaz qubyryna qatysty tıisti jumystar bastalady. Bul týraly Parlament Senatynda «Jasyl ekonomıka» taqyrybynda ótip jatqan Úkimet saǵatynda QR Energetıka vıtse-mınıstri Sábıt Nurlybaı málim etti, dep habarlaıdy QazAqparat.

«Qazirgi kezde eldi mekenderdi gazdandyrý boıynsha sharalardy júzege asyrýǵa kóp kóńil bólinip otyr. 2018 jyldyń qańtaryndaǵy jaǵdaı boıynsha Qazaqstan halqyn gazben qamtamasyz etý deńgeıi 47,38 paıyzdy qurady. Bul rette gazdandyrýdyń jalpy kestesine sáıkes, 2030 jylǵa qaraı bul kórsetkishti 56 paıyzǵa deıin jetkizý josparlanýda. Osy oraıda qosymsha 1,5 myńnan astam eldi mekendi gazben qamtamasyz etýge múmkindik beredi», - dedi vıtse-mınıstr.

Onyń sózine qaraǵanda, 2017 jyly 102 mlrd kVt/saǵat elektr energııasy óndirilse, sonyń ishinde gaz elektr stansalarynyń úlesi 20,2 paıyzdy qurady.

«Memleket basshysynyń tapsyrmasymen 1,5 jyl ishinde «Saryarqa» magıstraldy gaz qubyrynyń qurylysyn iske asyrýymyz qajet. Jobany júrgizetin Astana Gaz aktsıonerlik qoǵamy tenderdi jasap, qazirgi kezde merdiger anyqtaldy. Jeltoqsannan bastap tıisti jumystar bastalady, sondaı-aq kelesi jyldyń jeltoqsanynda qubyr salynyp bitedi dep josparlanyp otyr», - dedi S. Nurlybaı.

Budan buryn habarlanǵandaı, «Saryarqa» magıstraldy gaz qubyrynyń «Qyzylorda-Jezqazǵan-Qaraǵandy-Temirtaý-Astana» baǵyty boıynsha birinshi kezeńi 2019 jyldyń jeltoqsan aıyna deıin aıaqtalady. Birinshi kezeńniń boljamdy quny 267 mlrd teńgeden asady. Qaraǵandy, Aqmola oblystary men Astana qalasynyń ákimdikteri magıstraldy gaz qubyry men aımaqtyq jeliler qurylysynyń merzimin eskere otyryp, ınfraqurylym qurylysy úshin jol kartasyn ázirlegen.