Astanaǵa gaz qubyryn tartý quny belgili boldy
ASTANA. QazAqparat - Elordaǵa kógildir otyn jetkizetin «Saryarqa» magıstraldy gaz qubyrynyń quny belgili. Bul jaıynda búgin «Arnasaı» Jasyl tehnologııalar ortalyǵynda ótken QR Energetıka mınıstrligi Qoǵamdyq keńesiniń kóshpeli otyrysynda mınıstr Qanat Bozymbaev málim etti, dep habarlaıdy QazAqparat.
«QazTransGaz» kompanııasy Qyzylorda oblysynan Jezqazǵan, Qaraǵandy, odan keıin Astanaǵa jetkiziletin «Saryarqa» magıstraldy gaz qubyry qurylysynyń jobasyna qatysty tehnıkalyq-ekonomıkalyq negizdemeni ázirledi. Jobanyń ekinshi kezeńinde 2300 shaqyrymnan astam Kókshetaý-Petropavl qubyry tóselýi tıis. Joba quny 236 mlrd. teńge. Bul óte aýqymdy soma. Buǵan qosa elimizdiń soltústigine shamamen 3 mlrd. tekshe metr gaz jetkizý múmkindigi týyndaıdy», - dedi elimizdiń Energetıka mınıstri Qanat Bozymbaev.
Onyń atap ótýinshe, osydan bir aı buryn jobanyń tehnıkalyq-ekonomıkalyq negizdemesi «Memlekettik saraptama» RMK tarapynan oń qorytyndy alǵan. Joba gaz qubyry boıyndaǵy óńirlerdiń damýyna oń serpin bergenimen, sońǵy tutynýshyǵa kógildir otynnyń quny barynsha qymbat bolmaq. Sondyqtan «QazTransGaz» kompanııasy elimizde gazdyń baǵasyn ortasha deńgeıge keltirý úshin poshtalyq marka ádisine júginýdi usynyp otyr.
«Biz bul jaıynda Áset Isekeshevpen sóılesemiz. Sodan keıin kelesi aıda Premer-Mınıstrdiń otyrysynda baıandaıtyn bolamyz», - dedi ol.
