Astanaǵa esirtki jetkizetin iri arnanyń joly kesildi
ASTANA. QazAqparat - QR ІІM Esirtki bıznesimen kúres departamentiniń qyzmetkerleri Jambyl oblysynan Astanaǵa esirtki zattaryn jetkizip kelgen iri arnanyń kózin joıdy. Bul jaıynda QR ІІM Memlekettik til jáne aqparat departamentiniń dırektory Almas Sadýbaev óziniń Feısbýktegi paraqshasynda jazdy, dep habarlaıdy QazAqparat.
Onyń málimetinshe, Astana men Shý qalalarynda bir mezette júrgizilgen arnaıy operatsııa barysynda uıymdasqan qylmystyq toptyń 8 múshesi ustaldy. Toptyń jetekshisi - Jambyl obysynyń týmasy.
«Uıymdasqan qylmystyq top jetekshisiniń jaldap turyp jatqan páterin tintý barysynda salmaǵy 27 keliden asatyn «gashısh» esirtki zaty alyndy. Qylmystyq toptyń taǵy bir múshesiniń turǵylyqty jerin tintý barysynda 2 tsentnerden astam «marıhýana» men 11 keli «gashısh», sonymen qatar esirtki daıyndaýǵa arnalǵan syǵymdaý tsehy tabyldy. Kúdiktiler ýaqytsha oqshaýlaǵyshqa qamalyp, qylmystyq is qozǵaldy», - dedi Almas Sadýbaev.
