Astanaǵa esirtki tasymaldaıtyn taǵy bir arnanyń joly kesildi
ASTANA. Jeltoqsannyń 14-i. QazAqparat /Aıdar Ospanalıev/ - Jeltoqsannyń 6-sy men 13-i aralyǵynda respýblıka boıynsha 1 myń 857 qylmys tirkelip, olardyń 1 myń 450-niń izi sýymaı ashyldy.
Bul týraly búgin jýrnalıstermen bolǵan brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti, dep habarlaıdy QazAqparat.
Onyń sózine qaraǵanda, atalmysh merzimde qylmys jasady degen kúdikpen izdeýde júrgen 80 azamat qolǵa túsip, 29 atys qarýy tárkilengen. Sonymen qatar esirtkimen baılanysty 189 qylmys tirkelip, onyń 39 faktisi esirtkini saýdalaýǵa qatysty bolǵan. Tártip saqshylary zańsyz aınalymnan 20 kılá esirtki alyp, onyń 1,5 kılási geroın bolyp otyr. «Qyzylorda oblysyndaǵy «Shep-esirtki» beketinde tártip saqshylary «Aýdı-A6» markili kóliginiń júrgizýshisinen 113 gramm, onyń kóligindegi jolaýshydan 128 gramm geroın tapqan. Al Almatyda jarty kılogramm gashıshpen Qyrǵyzstan azamaty ustaldy. Onyń sózine qaraǵanda, atalmysh azamat esirtkini Qazaqstanda saýdalaý úshin óziniń elinen satyp alǵan», dedi departament bastyǵy.
Buǵan qosa jeltoqsannyń 11-i kúni elordaǵa esirtki tasymaldaıtyn taǵy bir arnanyń joly kesildi. Astana-Qaraǵandy baǵytyndaǵy jol boıyndaǵy «Qyzyljar» shep beketinde «Toıota» kóligindegi 36 jasar azamattan 140 gramm geroın alyndy. Al Qaraǵandy oblysynyń Temirtaý qalasynda 1 kılogramm geroındi saýdalamaq bolǵan jerinen qalanyń 25 jasar turǵyny men onymen birge turyp jatqan 32 jasar azamatsha ustaldy. Olardyń úıin tintý barysynda jatyn bólmedegi tósektegi jastyqtan 1 kılá 35 gramm geroın tabyldy.
