Qazandyqtan qara tútin shyqqan: Semeıde «Teplokommýnenergo» mekemesi tekserildi

SEMEI. KAZINFORM – Semeı qalasynda qazandyǵynan tútin shyqqan «Teplokommýnenergo» mekemesine qatysty tekserý júrgizildi.

Kesheli beri qala turǵyndary áleýmettik jelide qazandyqtan qoıý qara tútinniń shyǵyp turǵany kórinetin vıdeolardy taratyp jatyr. Halyq sonyń saldarynan aýa sapasynyń kúrt nasharlap ketkenin, dem alýdyń ózi qıyndaǵanyn aıtyp shaǵymdanýda.

Osyǵan baılanysty Abaı oblysynyń ekologııa departamenti «Teplokommýnenergo» kommýnaldyq memlekettik mekemesine jospardan tys tekserý júrgizdi.

- Tekserý nátıjesinde «JEO-1», «RK-1», «Ortalyq» jáne «Ǵabbasov» qazandyqtarynyń murjalarynda shyǵaryndylardy baqylaýdyń avtomattandyrylǵan júıesi ornatylmaǵany anyqtaldy. Soǵan oraı kásiporynǵa qatysty ákimshilik is qozǵaldy, - dep habarlady departamenttiń baspasóz qyzmetinen.

Eske salsaq, osyǵan deıin óskemendikterdiń aýa sapasyna shaǵymdanǵany habarlanǵan.