«Astanaǵa» Chempıondar Lıgasynyń toptyq kezeńine ótetin nátıje kerek - S.Stoılov
ASTANA. QazAqparat - Búgin «Astana-Arena» stadıonynda Chempıondar lıgasynyń pleı-off kezeńinde oınaıtyn «Astana» jáne «APOEL» fýtbol komandalarynyń erteńgi match aldyndaǵy baspasóz máslıhaty ótti.
Baspasóz máslıhaty barysynda «Astana» klýbynyń bas bapkeri Stanımır Stoılov komanda aldynda turǵan mindettiń biri qorǵanys shebin tas-túıin ustaı otyryp oınaý kerek ekenin atap ótti.
«Erteńgi match jaýapty oıyn ekenin bilemiz. Biz bar kúshimizdi salyp, uıymdasa otyryp oınaýymyz qajet. «Astana» Chempıondar Lıgasynyń toptyq kezeńine ótetindeı nátıje kórsetýi kerek. Esepti de umytpaýymyz kerek, biraq, eki kezdesýdiń qorytyndysy boıynsha «Astana» týrnırdiń toptyq kezeńine joldama alsa... «APOEL» tamasha komanda, onyń tájirıbesi de kóp, óz-ózine degen senimi de bar. Bizge qorǵanysty kúsheıtip, gol jibermeı ári uıymdasa oınaý mańyzdy»,-dedi ol.
«Astananyń» bas bapkeri komandanyń buǵan deıingi «fantastıkalyq» oıynyn eske saldy jáne erteń jankúıerler men óz alańymyzda oınaý fýtbolshylarymyzdyń jeńiske degen senimin kúsheıtetindigin jetkizdi.
Esterińizge sala keteıik, «Astana»-APOEL arasyndaǵy birinshi kezdesý 18 tamyz kúni saǵat 22.00-de «Astana-Arena» stadıonynda ótedi. Al, kıprlik komandanyń jaýapty matchy 26 tamyz kúni Nıkoskıda bolady (Astana ýaqytymen túngi saǵat 00.45-te).
