Astanaǵa brazılııalyq djıý-djıtsý sheberleri keledi

ASTANA. QazAqparat - Astanada Qazaqstannyń jáne sheteldiń sportshylary djıý-djıtsýden «brazıl sıstem» bóliminen Ashyq respýblıkalyq týrnırde Elorda kýbogyn sarapqa salady, dep habarlaıdy QazAqparat qala ákimdiginiń saıtyna silteme jasap.

Dúbirli doda 5-7 qazanda «Dáýlet» sport kesheninde ótedi. Elordanyń 20 jyldyǵyna oraılastyrylǵan aýqymdy shara QR Mádenıet jáne sport mınıstrliginiń jáne Astana qalasy ákimdiginiń qoldaýymen QR Djıý-djıtsý qaýymdastyǵynyń bastamasymen uıymdastyrylyp otyr.

Respýblıkalyq týrnırge Azııa qurlyǵy men araldardyń, basqa da memleketterdiń, oblystar men Astana jáne Almaty qalalarynyń komandalary qatysady.

Jarysqa aq, kók, qyzylkúreń, qońyr, qara belbeýlerge bólingen 6-45 jas aralyǵyndaǵy sportshylar jiberiledi. 5 qazanda sportshylar keledi. Sondaı-aq 6-15 jastaǵy jasóspirimderdiń salmaǵyn ólsheý josparlanǵan. Al jekpe-jekter 6 jáne 7 qazanda «Dáýlet» sport kesheninde ótedi.

6 qazanda saǵat 10:00-den 14:00-ge deıin balalar arasyndaǵy jarys ótedi. Osy kúni saǵat 14:00-de djıý-djıtsýden Astana kýbogynyń ashylý saltanaty uıymdastyrylady. Budan basqa, saǵat 14:00-den 15:30-ǵa deıin «Astana Jiu-Jitsu Cup 2018» aıasynda «Han Shatyr» saýda, oıyn-saýyq kesheninde brazılııalyq djıý-djıtsýden Álem chempıony Alana Fınfoý jáne djıý-djıtsýden basqa da álemdik juldyzdardyń qatysýymen semınar ótedi.

Jeksenbi kúni, 7 qazanda «Dáýlet» sport keshenindegi jarys 10:00-de bastalady. Jeńimpazdar arasyndaǵy tıtýl úshin absolıýtti jekpe-jekter saǵat 19:00 belgilengen.

Astana Jiu-Jitsu Cup kýbogy qazaqstandyq sportshy Darhan Nortaev pen brazılııalyq Artýr Lanestiń, sondaı-aq Nurjan Seıdýalı men Lýkas Pınheıronyń arasyndaǵy chempıondyq belbeý úshin kúrespen aıaqtalady.

Astana Jiu-Jitsu Cup dodasynyń eń qyzyqty jekpe-jekterinde ataqty brazılııalyq sheberler Alan Fınfoýmen Gýstavo Kampos kúsh synasady. Aıta keteıik, Brazılııadan keletin qonaqtar ońtústikamerıkalyq óńirdiń jáne álemniń tanymal djıtserleriniń biri bolyp tabylady. Týrnır jeńimpazdary men júldegerleri uıymdastyrýshylar tarapynan estelik medaldar alady. Al absolıýttik salmaqtar sanatyndaǵy júldegerlerge kók, qyzylkúreń, qońyr, qara belbeýler boıynsha «adult» sanatynda aqshalaı syılyqtar da beriledi. Jarystyń jalpy júlde qory - 15 myń dollar.