Astanaǵa bıyl 8 mln-daı gúl egiledi
ASTANA. QazAqparat - Bıyl 162 288 sharshy metr jerge gúl otyrǵyzý josparlanǵan, sonyń ishinde bir jáne kóp jyldyq ósimdikter de bar, 25 myńǵa jýyq frantsýz raýshangúliniń kósheti egiledi. Bul týraly elordanyń resmı saıty habarlaıdy.
Elordanyń sáýlet-peızajdyq kelbetin qurýda gúlzarlardy bezendirý de mańyzdy. Gúl otyrǵyzý jumystary mamyr aıynda bastalǵan. Jazda 147 myń sharshy metrden astam jerge gúlzar jasalady, sonyń ishinde «Almaty» aýdanynda - 50 436 sharshy m, «Esil» aýdanynda - 80 999 sharshy m, «Saryarqa» aýdanynda - 16 155 sharshy m.
Gúlbaqtaryn, aspaly jáne statsıonarlyq qumyralardy, kashpolardy bezendirý úshin 7 mln 700 myńnan astam bir jyldyq gúl otyrǵyzylady.
Sapaly gúldermen qamtamasyz etý úshin «Astana-Zelenstroı» AQ eki jylyjaıda bir jyldyq gúlder men tóselmeli ósimdikter kóshetterin ósiredi. Onyń ústine, № 1 jylyjaı sharýashylyǵynda kilem tárizdi ósimdikterdiń túr-túri bar. Atap aıtqanda, alternanterdiń eki túri, sedýmnyń toǵyz túri, tsınerarıı, eheverııa, qamys, ırezıne, santolına, senetsıo, bozot jáne t.b. Pil, kerik, tasbaqa, hokkeıshiler, «Tabıǵatty aıalaıyq» kompozıtsııasy, jer shary, túıeler, qumyralar, fýtbol doby jáne t.b. tik jasyl fıgýralardy naq osy gúldermen bezendirilgen. Jalpy, 19 sándik fıgýraǵa 643 myńǵa jýyq tóselmeli kilem tárizdes ósimdik ósirilgen.
