Astanaǵa byltyr qansha týrıst kelgeni belgili boldy

ASTANA. KAZINFORM — 2024 jyly elorda 1,5 mıllıon týrısti qabyldady, bul 2023 jylmen salystyrǵanda 14%-ǵa kóp, dep habarlaıdy Investıtsııalar jáne kásipkerlikti damytý basqarmasynyń basshysy Halel Ákimjanov.

Basqarma basshysynyń aıtýynsha, týrıster negizinen Reseı, Qytaı, Germanııa, Túrkııa, AQSh jáne Ońtústik Koreıa elderinen keledi.

— Bıznes-týrızm men medıtsınalyq týrızm qarqyndy damyp keledi. Erekshe nazar oqıǵalyq (ıvent) týrızmge bólinip otyr. Sonymen qatar, gastronomııalyq jáne mádenı-sporttyq týrızmge basymdyq berilýde. Jalpy, 2024 jyly elordada 168 halyqaralyq deńgeıdegi is-shara ótti. Olardyń qatarynda ShYU, VIK, Automechanika, Enactus, Comic Con jáne basqa da mańyzdy sharalar bar. Bıyl 300-den astam mádenı-sporttyq shara ótkizý josparlanyp otyr, — dedi ol elordada Kommýnıkatsııalar qyzmetinde ótken brıfıngte.

Onyń sózinshe, Astanada týrızmniń turaqty damýy úshin mynandaı mindetter qoıylyp otyr:

• halyqaralyq bıznes, oqıǵalyq jáne sporttyq-buqaralyq is-sharalardy tartý;
• medıtsınalyq jáne gastronomııalyq týrızmdi damytý men ilgeriletý.

Halel Ákimjanov atap ótkendeı, bul is-sharalar tek qalanyń ımıdjin nyǵaıtýdyń quraly ǵana emes, sonymen qatar ekonomıkalyq ósim men týrıstik salanyń damýyna yqpal etetin mańyzdy faktor bolyp tabylady.

— 2025 jyldyń aqpan aıynda «Astana Tourism» Týrızmdi damytý ortalyǵy óz jumysyn bastady. Onyń basty maqsaty — Astanany Ortalyq Azııadaǵy iskerlik jáne oqıǵalyq hab retinde damytý, — deıdi Ákimjanov.

Osyǵan deıin Astana ákimi Jeńis Qasymbek Instagram paraqshasynda qurylys kompanııalaryna qoıylatyn talaptar týraly jazdy.