Astanaǵa atpen kele jatqan jolaýshy jubaılardyń márege jetetin kúni belgili boldy

ASTANA. KAZINFORM – Qytaıdyń Tarbaǵataı aımaǵynan atpen jolǵa shyqqan jas jubaılar — Qýanbek Túsiphanuly men Jaına Erkinqyzy 20 qazan kúni Astanaǵa jetedi. Bul týraly Kazinform tilshisine saıahatshylardyń ózi aıtyp berdi.

– Oıǵa alǵan úlken armanymyzdyń júzege asýyna sanaýly ýaqyt qaldy. Kóńil kúıimiz de, astymyzdaǵy atymyzdyń jaı-kúıi de óte keremet. Qazaq eliniń elordasy – Astanany kórýge asyǵyp kelemiz. Buıyrsa, erteń, 20 qazan kúni Astanaǵa at basyn tireımiz, - deıdi Qýanbek Túsiphanuly.

Olar Tarbaǵataı aımaǵyna qarasty Saýan aýdanynan 8 tamyz kúni jolǵa shyqqan bolatyn. Eki aıdan astam ýaqytyn at ústinde ótkizgen jolaýshylar qazaqtyń ulan-ǵaıyr dalasyn at tuıaǵymen dúbirletip, Saryarqaǵa jetti.

Sapardyń jalpy aralyǵy – 2 500 shaqyrymnan asady. 

Aıta keteıik, buǵan deıin saıtymyzda saıahatshylardyń uzaq sapary týraly maqala jaryq kórgen edi.