Astanaǵa ataqty Izraıl sýretshisi Avıva Shemer keldi
ASTANA. 28 maýsym. QazAqparat - «Qulanshy» qazirgi zaman óner ortalyǵynda ataqty Izraıl sýretshisi, músinshi jáne dızaıner Avıva Shemerdiń jeke kórmesi ashyldy.
A. Shemerdiń aıtýynsha, onyń basty baǵyty - art-terapııa, ıaǵnı óner arqyly adamnyń jan-dúnıesin ońaltý. A. Shemerdiń art-sabaqtaryna álemniń túkpir-túkpirinen jandaryna shıpa izdegen adamdar kelip, qatysady.
«Ónerdiń bul aǵymy adamnyń kóńiline sáýle túsirip, baqytty bolýyna arnalǵan. Trenıngter barysynda meni osyǵan daǵdylaǵan ravvınderdiń ǵaqlııa-ósıetterine súıenemin. Men ózim de klassıkalyq jáne evreı pálsapasyn tereń zerttegen adammyn. Kóp bilimdi Kabbaladan sarqydym», - deıdi ol.
Onyń aıtýynsha, qylqalam sheberiniń ónerge bet alýyna onyń týǵan jáne naǵashy atalary tikeleı áser etken. «Meniń eki atam da jadymda saqtalǵan. Olardyń biri aǵash sheberi boldy. Onda árdaıym aqshasy bolmasa da, men úshin ol dúnıedegi eń baı adam jáne eń sheber sýretshi bolyp esepteletin. Bolmysymdaǵy shyǵarmashylyq daryn sol kisiden bolsa kerek. Al ekinshi atam qala ravvıni bolǵan. Rýhanı baılyq osy kisiden daryǵan», - deıdi sýretshi.
Avıva Shemer art-terapııa jáne evreı fılosofııasy salalarynyń sheberi dárejesine ıe. Ol Haıfa qalasyndaǵy Óner galereıasynyń meńgerýshisi, art-terapııa sabaqtaryn ótkizip, sáýlet jobalaryna belsendi qatysyp turady. A. Shemerdiń týyndylary Izraıldiń jáne odan tys elderdiń jeke qorlarynda saqtaýly tur, «Sóz qýaty» kitabynyń avtory.
