Astanaǵa áskerı bortpen qazaqstandyq UOS jaýyngerleriniń súıegi jetkizildi
ASTANA. KAZINFORM — Qazaqstan Qarýly kúshteri áskerı-kóliktik avıatsııasynyń ushaǵy Uly Otan soǵysy jyldarynda qaza tapqan qazaqstandyq jaýyngerler Orazǵalı Aıbolanuly Belýbaev pen Petr Kapıtonovıch Okonechnıkovtyń múrdelerin Máskeýden Astanaǵa jetkizdi.
Qarýly kúshterdiń Ulttyq áskerı-patrıottyq ortalyǵynda marqumdardyń súıegin týystaryna tabystaý rásimi ótti. Іs-sharaǵa Reseı men Belarýstiń Qazaqstandaǵy elshilikteriniń ókilderi, áskerı qyzmetshiler, Qarýly kúshterdiń ardagerleri, qurmet qaraýyl rotasynyń sarbazdary, «Jas sarbaz» áskerı-patrıottyq qozǵalysynyń tárbıelenýshileri, kolledj stýdentteri jáne qaza tapqan jaýyngerlerdiń týystary qatysty.
Qorǵanys mınıstriniń tárbıe jáne ıdeologııalyq jumystar jónindegi orynbasary general-maıor Shaıh-Hasan Jazyqbaev atap ótkendeı, QR Qorǵanys mınıstrligi, «Atamnyń amanaty» QB, Qazaqstan men shet elderdiń izdestirý jasaqtary soǵys jyldarynda habar-osharsyz ketken jaýyngerlerdiń taǵdyryn anyqtaý jumystaryn jalǵastyrýda.
– Іzdeý jasaqtarynyń eńbeginiń arqasynda 80 jyldan keıin soǵys kezinde iz-túzsiz ketken batyrlardyń esimderi qaıta oralyp jatyr. Tabylǵan árbir sarbaz – týysqandar men urpaqtardyń jubanyshy, – dep atap ótti general-maıor Shaıh-Hasan Jazyqbaev.
«Atamnyń amanaty» QB basqarma tóraǵasy Murat Moldaǵalıev Ekinshi dúnıejúzilik soǵys kezinde 271 myńnan astam qazaqstandyq habar-osharsyz ketkenin atap ótti. Orazǵalı Belýbaev pen Petr Okonechnıkovqa deıin olardyń birlestigi 19 qazaqstandyq jaýyngerdiń súıegin týǵan Otanyna jetkizip, áskerı qurmetpen jerleýdi uıymdastyrdy.
Іs-sharany uıymdastyrýshylar men izdeýshilerge qaza tapqan jaýyngerlerdiń týystary alǵysyn bildirdi.
– Meniń aǵam Petr Okonechnıkov ushqysh boldy. 19 jasynda qaza tapty. Tipti, otbasyn qurýǵa da úlgermedi. Ákemniń aıtýy boıynsha, anasy bul qaıǵyny kótere almaı, birneshe jyldan keıin qaıtys bolypty. Aǵamyz ákesiniń, ıaǵnı meniń atamnyń qasyna jerlenedi. Soǵysta qaza tapqan jaýyngerlerimizge týǵan jerden topyraq buıyrǵanyna qýanyshtymyn, – dedi Petr Kapıtonovıchtiń nemere inisi Igor Okonechnıkov.
Murat Moldaǵalıevtiń aıtýynsha, qyzylásker Orazǵalı Belýbaevty Reseıdegi Novgorod oblysynyń Sobolevo aýylynda izdeý jumystary barysynda «Nahodka» jasaǵynyń músheleri tapqan. Onyń janynan beldikter, ilgekter, qalta pyshaǵy jáne medalon tabylypty. Sonyń arqasynda onyń 1908 jyly týǵany anyqtaldy. 1941 jyldyń jazynda Semeı oblysynyń Órnek kolhozynan maıdanǵa shaqyrylǵan eken. 1943 jyly tamyzda Novgorod oblysy Staraıa Rýssa dervenıasy úshin bolǵan shaıqasta qaza tapqan. Orazǵalı Belýbaevtyń súıegi Abaı oblysy Zýbaıyr aýylynda qaıta jerlenetin bolady.
8-shi avıatsııa polkiniń bortradısi serjant Petr Okonechnıkovtyń súıegi Reseı Geografııalyq qoǵamy men Reseı Federatsııasy Qorǵanys mınıstrliginiń Alıaska – Sibir áýe trassasynyń nysandaryn zertteý ekspedıtsııasy kezinde tabylǵan.
Petr Okonechnıkov 1924 jyly dúnıege kelgen. Ol Shyǵys Qazaqstan oblysy Zyrıan aýdany Kýtıha aýylynyń týmasy. 1943 jyly 28 tamyzda «Dýglas» Sı-47 ushaǵynda jaýyngerlik tapsyrmany oryndaý barysynda apatqa ushyrady. Múrdeniń janynan ushý kartalary, sondaı-aq № 9248726 nómirli qazaq tilinde toltyrylǵan komsomol bıleti tabylǵan. Petr Okonechnıkov Shyǵys Qazaqstan oblysy Altaı qalasynda qaıta jerlenedi.
Aıta keteıik, Almatyda jaýdyń júzdegen mınasyn joıǵan 102 jastaǵy soǵys ardageri turady.