Astanaǵa arman qýyp kelgen jastar baspanaly bolǵanda qandaı sezimde bolǵanymen bólisti
Qala basshysy elorda ákimdiginde ótken saltanatty jıyn barysynda otbasylardy osynaý ataýly kúnmen quttyqtaı otyryp, memlekettiń áleýmettik mindettemeleri jumystyń basty basymdyǵy bolyp tabylatynyn jáne onyń tolyq kólemde oryndalatynyn atap ótken bolatyn: «Búgin, Qazaqstan Respýblıkasynyń Táýelsizdigi kúni qarsańynda, 72 jas otbasy páter kiltine ıe bolyp jatyr. Jas otbasylarǵa arnalǵan turǵyn úı qurylysynyń jańa baǵyty tikeleı Prezıdenttiń tapsyrmasymen ázirlendi. Memleket bul máselege árqashan kóńil bólip, barynsha qoldaý kórsetip keledi. Sizderdi búgingi qýanyshtaryńyzben shyn júrekten quttyqtaımyn! Jańa qonystaryńyz bereke men qýanyshqa tola bersin». Baspanaly bolyp jatqan 72 januıanyń ishinde eki bala tárbıelep otyrǵan jas otbasy Bilimbek Seksentaıulynyń da shańyraǵy bar. Tildeskenimizde áıeli Aılanysh ekeýi áli de qýanyshtan júregi jarylardaı bolyp otyrǵanyn jasyra almady. «Bul bizdiń kópten kútken, talaıdan ańsaǵan asyl armanymyz edi. Áli de baspanaly bolǵanyma sene almaı otyrmyn. «Úıi joqtyń kúıi joq» deıdi ǵoı halqymyz, osyǵan deıin páter jaldap keldik, aqshamyzdyń kóp bóligi sonyń aqysyna ketetin. Jas otbasylarǵa, jastarǵa osyndaı múmkindik syılaǵan Elbasymyzǵa sheksiz alǵysymdy bildiremin», - deıdi Bilimbek qýanyshy qoınyna syımaı. Otaǵasy qujattardy qabyldaý 2014 jylǵy maýsym aıynyń 2-10 aralyǵynda júrgizilgenin aıtty. Osydan soń konkýrs ótken. Úıden úmitti jas otbasylardyń qaısysy tizimge ilingeni tamyz aıynyń sońynda málim bolǵan. «Tamyz aıynyń sońy bolatyn. Keshqurym kúıeýimniń tanysy qońyraý shalyp: «Ákimdiktiń saıtyna «Jas otbasy» baǵdarlamasy boıynsha úı alǵandardyń tizimi shyǵypty, ishinde sender barsyńdar», dep súıinshilegende biz Qaraǵandyǵa barar jolda bolatynbyz. Joldasym óz qulaǵyna ózi senbeı, kólikti joldyń jıegine toqtatyp qoıyp turyp sóılesti. Sol sáttegi qýanyshymdy sózben aıtyp jetkizý múmkin emes», - deıdi eki balanyń anasy Aılanysh. Bilimbek Seksentaıuly - Astanaǵa arman qýyp kelgen kóp jastyń biri. Qaraǵandynyń Buqar jyraý aýdanynan. Eýrazııa ulttyq ýnıversıtetin «qurylysshy-jobalaýshy» mamandyǵy boıynsha bitirgen. Magıstr. Qazirgi tańda óz mamandyǵy boıynsha «Jaıly orta-KZ» JShS-ynda jobalaýshy bolyp jumys istep júr. Zaıyby da osy oqý ordasyn telekommýnıkatsııa mamandyǵy boıynsha támamdaǵan. Búginde ózi túlep shyqqan bilim ordasynda ustaz bolyp qyzmet etip júr. «Páter kiltin qolyńyzǵa ustatqan sátte qandaı sezimde boldyńyz?» degen suraǵyma otaǵasy sál kidirip qaldy. Sol sáttegi tebirenisi esine túsip, sol sezim boıyn taǵy bir sharpyp ótse kerek. Sálden soń: «Shynymdy aıtsam, buǵan deıin ózimdi áne-mine aýylǵa ketetin adam sekildi sezinip júretinmin, Astanadaǵy tirligim, istep júrgen jumysym ýaqytsha sharýa sekildene beretin. Kiltti qolyma ustatqan sátte budan bylaı Astanada qalatynymdy, búkil bolashaǵymdy osy qalamen baılanystyratynymdy sezindim. Endi elimniń erteńi úshin aıanbaı eńbek etip, búkil kúsh-jigerim men bilim-biliktiligimdi jumsaıtyn bolamyn», - dep jaýap berdi ol. Ras, bir baspanaǵa qol jetkizý búginde talaı jas otbasynyń asyl armany. Ásirese, elimizdiń túkpir-túkpirinen jastar kóp jınalatyn elordamyzda bul másele óte ózekti. Alaıda, bul múlde qol jetpeıtin arman emes. Oǵan tómendegi derekter dálel. Tek sońǵy jyldary áleýmettik baǵdarlamalar boıynsha 4,5 myń astanalyq baspanaly bolǵan. 2014 jyly elordada jas otbasylarǵa arnalǵan turǵyn úı baǵyty boıynsha 672 páter bólingen eken. Búginde 211 otbasy úılerine kóship úlgergen, al biz aıtyp otyrǵan 72 otbasy Sarybulaq ózeniniń boıynda oryn tepken (S 409 kóshesi, 43, 45, 47 úıler) úılerge qonystanady. Astana ákimdigi keltirgen derekterge súıensek, jas otbasylarǵa arnalǵan qalǵan 389 páter turǵyn úı komıssııasynyń aldaǵy otyrysynda úlestiriletin bolady. Jalpy, «Óńirlerdi damytý - 2020» baǵdarlamasy aıasynda turǵyn úımen qamtamasyz etýdiń bes baǵyty qarastyrylǵan, sonyń ishinde eski jáne apatty jaǵdaıdaǵy úılerdi buzý pılottyq jobasy da bar. Atalǵan joba aıasynda 3 500 otbasy jańa úılerge kóshirilmek. Erbol JANAT
