Astanaǵa amerıkalyq ártis Nıkolas Keıdj keledi
ASTANA. QazAqparat - 2017 jyldyń 22-28 shilde aralyǵynda "EKSPO-2017" halyqaralyq mamandandyrylǵan kórmesi aıasynda Astana qalasynda Kann, Berlın, Venetsııa syndy «A» klassynyń festıvalderimen teń dárejede prodıýserlik qaýymdastyqtyń Halyqaralyq odaǵynda tirkelgen, Orta Azııadaǵy aýqymdy kınoforým bolyp tabylatyn HІІІ Halyqaralyq «Eýrazııa» kınofestıvali ótedi. Atalmysh kınofestıvaldiń elordamyz Astanada ótizilýi ekinshi ret. Buǵan deıin halyqaralyq úzdik fılmder festıvali Astanada 2008 jyly ótken bolatyn.
2012 jyly «Eýrazııa» halyqaralyq kınofestıvalin ulybrıtanııalyq Jylyna bir ret jaryq kóretin «International Film Guide» jýrnaly ony álemniń 35 jetekshi kınofestıvalderiniń tizimine qosty.
«Eýrazııa» kınofestıvaliniń negizigi maqsaty- Qazaqstan kıno ındýstrııasyn damytý, kıno ónerine keń jurtshylyqtyń qyzyǵýshylyǵyn arttyrý jáne Azııa men Evropa elderiniń jemisti yntymaqtastyǵy úshin sharttar oılastyrý.
13-shi «Eýrazııa» kınofestıvali baǵdarlamasynda, búgingi tańda Qazaqstannyń astanasynda ótip jatqan álemdik aýqymdy is-shara- «Astana Ekspo-2017» halyqaralyq mamandandyrylǵan kórmesiniń tujyrymdamasymen úndes «Mádenıetter kópiri» taqyryby qozǵalady. Sondaı-aq, osy joly bir aptaǵa sozylatyn kınofestıvaldiń sheteldik qonaqtarynyń qatarynda álemge esimderi tanymal, «Oskar» jáne «Altyn globýs» laýreaty, belgili amerıkalyq ártis Nıkolas Keıdj, "Oskar" júldesiniń eki dúrkin nomınanty Djon Málkovıch jáne "Oskar" jáne "Sezar" premııalarynyń ıegeri, akter, ári prodıýser Edrıen Broýdı syndy gollıvýdtyń jarqyn juldyzdary bar. Sondaı-aq, kınofestıvalge amerıkandyq aktrısa Baı Lın, festıvaldik qozǵalystyń orasan zor qaıratkeri, prodıýser Marko Mıýller, osy jylǵy «Evrazııa» HKF-inde negizgi qazylar alqasyn basqaratyn, Kann kınofestıvaliniń laýreaty Sýleıman Sısse kelmek. Eýrazııa keńistigindegi sońǵy jyly túsirilgen eń úzdik kartınalardy kórsetetin atalmysh kınofestıval qaı kezde de álemge tanylymal aıtýly qonaqtarymen qadirli ekengdigi aıqyn.
Aıta ketý kerek, bıylǵy «Eýrazııa» halyqaralyq kınofestıvali 2016-2017 jyldary jaryq kórgen keń aýqymdy álemdik fılmderdiń kórsetilimin usynady. Konkýrstyq jáne konkýrstan tys sektsııalarǵa tolyqmetrli jáne qysqametrli kartınalar, avtorlyq jáne janrlyq kıno kiredi. «Bes qurylyq» balalar fılmderiniń konkýrsy, sonymen qosa, Ekspo-2017-men birigip uıymdastyrylǵan damýshy elder baǵdarlamasy «6 plaza» ótedi.
Kınfoestıvaldiń tarıhynda tuńǵysh ret «Eýrazııa» HKF-niń aıasynda TMD, Shyǵys, ıaǵnı Qytaı, Úndistan, Ońtústik Koreıa jáne Batys elderiniń fılm satýshylary men satyp alýshylarynyń qatysýymen Eurasia Film Market Dástúrli bıznes-alańy kınojobalar pıtchıngterin, dóńgelek ústelderin, baspasóz-konferentsııalaryn, sheberlik-saǵattaryn jáne arnaıy is-sharalaryn usynady.
Dástúr boıynsha kınofestıvaldyń jabylý saltanatynda Gran-Prıdi jeńip alǵan fılm kórsetiletin bolady.
Esterińizge sala keteıik, halyqaralyq «Eýrazııa» kınofestıvali 1998 jyldan beri ótkizilip keledi.
XIII Halyqaralyq «Eýrazııa» kınofestıvali Qazaqstan Respýblıkasynyń mádenıet jáne sport Mınıstrliginiń tapsyrysymen «Ulttyq kınematografııa óneri men ǵylymdarynyń akademııasy» Qoǵamdyq birlestigimen iske asyrylady. Aqparattyq qoldaý kórsetýshi - «Habar» agenttigi.
