Astanaǵa alǵashqy elektroavtobýstar qashan jetkiziledi
ASTANA. QazAqparat - Elordaǵa jetkiziletin elektroavtobýstardy synaqtan ótkizý sharalary osy aıda bastalady, dep habarlaıdy QazAqparat tilshisi.
Qazaqstannyń avtobıznes qaýymdastyǵynyń prezıdenti Andreı Lavrentevtiń aıtýynsha, búginde Astana qalasynyń ákimdigi elektromobılder naryǵyn damytý boıynsha arnaıy baǵdarlama ázirledi. Sonyń aıasynda tolyǵymen elektr energııasymen júretin otandyq avtobýstar elordaǵa jetkiziledi. Oǵan qosa, óndirýshi kásiporyn óz esebinen qajetti ınfraqurylymdy - zarıadtaý oryndary jáne taǵy basqasyn jasaqtaıdy.
«Menińshe, aǵymdaǵy jyly jazǵa qaraı alǵashqy elektroavtobýstardy Astanaǵa jetkizemiz. Osy aıdyń sońynda test bastalady. Sol kezde elektroavtobýstardy qysqy ýaqytta qoldaný jaǵy tekseriledi. Óıtkeni «Atalǵan kólikter qatty aıazda júre ala ma?» degen suraqtar boldy. Degenmen, elektroavtobýstar aıazda da, ystyqta da júre alady. Men ony anyq bilemin. Sebebi, búginde oǵan qajetti barlyq tehnologııalar bar», - dedi A.Lavrentev Astanada ótken baspasóz máslıhatynda.
Uıym basshysynyń sózine qaraǵanda, qazirdiń ózinde elordada 50 zarıadtaý stansasy ornatylǵan. «Operator ROP» kompanııasy arnaıy kartalardy daıarlap jatyr. Onymen Astana, Almaty jáne «Astana - Býrabaı» tas jolynda elektromobılderdi zarıadtap alýǵa bolady.
«Negizi, buryn elektroavtobýstar qatty qymbat boldy. Búginde ondaı kóliktiń baǵasy kádimgi avtobýstan 10-20 protsentke ǵana qymbat. Sosyn qazirgi avtobýstarda dızel otyny, maı jáne qosalqy bólshekter sııaqty shyǵyndar bar. Al elektroavtobýstarda ondaı joq. 5-7 jyldyń ishinde ondaı kólik dızelmen júretin avtobýstan da arzanǵa túsedi», - dep atap kórsetti A.Lavrentev.
Aıta keteıik, búgin Qazaqstannyń avtobıznes qaýymdastyǵy ótken jyldyń qorytyndysyn shyǵardy. Uıymnyń vıtse-prezıdenti Anar Maqashevanyń aıtýynsha, ótken jyly qazaqstandyqtar 60 myń jańa kólik satyp aldy. Sonyń teń jartysy - óz elimizde qurastyrylǵan avtomobılder. Jalpy, Qazaqstan xalqy jańa kólikterdi satyp alýǵa 547 mlrd teńge jumsady. Bul 2017 jylmen salystyrǵanda 24 protsentke artyq. Al Úkimet otandyq kólik markasyn jasap shyǵarýdy tapsyrdy.
