Astanaǵa álemniń jeti elinen jas oryndaýshylar keledi
ASTANA. 26 maýsym. QazAqparat - «Boztorǵaı» qoǵamdyq qory «Báıterek» monýmentininiń aldyndaǵy alańda 3-shi «Shattyq» Halyqaralyq festıvalin ótkizedi.
Festıval 5-7 shildede ótedi, gala-kontsert pen jeńimpazdardy marapattaý rásimi 6 shildede bolady, dep habarlady Qala kúnin merekeleý jáne ótkizý boıynsha uıymdastyrý komıtetiniń shtaby.
Qazaqstannyń barlyq óńirlerinen jınalǵan jas ánshiler, bıshiler men halyq ánderin oryndaýshylar, sulýlyq teatrlary, sondaı-aq Qyrǵyzstan, Ózbekstan, Reseı, Lıtva, Qytaı, Túrkııa men Bolgarııadan ártister elordamyz Astanaǵa keledi dep kútilýde.
Festıvalge 5-18 jas aralyǵyndaǵy balalar men jasóspirimder qatysady. Baǵdarlama vokal, horeografııa, folklor, ınstrýmentaldy, sulýlyq teartry sııaqty janrlardan turady.
