Astanaǵa AQSh-tyń burynǵy prezıdenti Bıll Klınton kelmek - BAQ-qa sholý
***
«Úkimet basshysy Serik Ahmetov Almaty qalasynda arnaıy jumys saparymen bolyp, kásipkerlermen kezdesti jáne qala ákimdiginde megapolısti damytý máselesine arnalǵan keńes ótkizdi», - dep jazady «Egemen Qazaqstan» gazeti búgingi sanyndaǵy «Megapolıstiń mańyzdy máseleleri» degen taqyryptaǵy maqalasynda. Basylymnyń atap ótýinshe, Úkimet basshysy Almaty qalasynyń kásipkerlerimen kezdesýi barysynda shaǵyn jáne orta bıznesti damytýdyń ózekti máselelerin talqylandy. Premer-Mınıstr Almatynyń áleýmettik-ekonomıkalyq damýyna kásipkerliktiń qosyp otyrǵan zor úlesine toqtala kele, Memleket basshysynyń qoldaýy arqasynda Almaty «otandyq bıznestiń ozyq ókilderi jumys istep jatqan belsendi jáne kreatıvti kásipkerleri bar Qazaqstannyń qarjy jáne bıznes ortalyǵyna aınalǵanyn» atap kórsetti.
«Egemen Qazaqstan» gazetiniń jazýynsha, «Astana sý arnasynda» bereshekterdi tóleý jumystary jalǵasýda. 1 naýryzǵa deıingi sý-kárizdik qyzmetter úshin jalpy debıtorlyq bereshek 184,0 mıllıon teńgeni qurasa, sonyń ishinde jeke adamdar bereshegi - 67,1, qalanyń kásiporyndary men uıymdarynyń úlesi - 116, 7 mıllıon, bıýdjettik uıymdar bereshegi 209,0 myń teńgege jetken. Kommýnaldyq brıgadalar aldyn ala eskertkennen keıin qaryzdyq tólemi 3 aıdan asqan azamattardy sýmen qamtamasyz etý toqtatylyp, ortalyq júıeden ajyratylady. Aǵymdaǵy jyldyń basynan bastap jeke adamdarǵa bereshek somasy 55,8 mıllıon teńgeni quraıtyn 5068 eskertý taratyldy. Zańdy tulǵalarǵa bereshek somasy 1,1 mıllıon teńgeni quraıtyn 15 eskertý taratyldy, al onyń búgingi tańda 1,0 mıllıon teńgesi tólendi. Maqala «Qaryzdan nege qoryqpaıdy?» degen taqyryppen basyldy.
***
Bıyl altynshy ret ótkiziletin Astana ekonomıkalyq forýmy taǵy da saıasatkerler men ǵalymdardyń, bıznes qaýymdastyqtyń suhbat qurar alańyna aınalady. Bul jaıynda «Aıqyn» gazetiniń búgingi nómirindegi «Klıntonnyń ózi keledi» degen taqyryptaǵy maqalada keńinen baıandalǵan. Basylymnyń atap ótýinshe, osymen altynshy márte ótkiziletin alqaly jıynǵa 8 myńnan astam adam qatysatyndyǵy kútilse, qazirdiń ózinde 60 memlekettiń mártebeli tulǵalary, Nobel syılyǵynyń 10 laýreaty, 40-tan astam iri iskerlik korporatsııalar basshylary, 11 memleket pen úkimet basshysy, 15 mınıstr men ortalyq bankterdiń, halyqaralyq uıymdardyń basshylary qatysatyndyǵyn rastaǵan. Olardyń qatarynda AQSh-tyń burynǵy prezıdenti Bıll Klınton da bar.
Osy basylymnyń búgingi sanynda Májilis depýtaty Andreı Begeneevpen aradaǵy suhbat «Qazaqtyń dana ósıetin oryndadym» degen taqyryppen berildi. Basylym tilshisiniń barlyq saýalyna tuşymdy jaýap bergen halyq qalaýlysy: «Biz jergilikti sý qoryna qamqorlyqpen qaraýymyz, utymdy paıdalanýymyz qajet. Jaratqan bergen osy resýrsty maqsatty, nysanaly túrde jumsaýǵa kóshetin ýaqyt baıaǵyda-aq jetti. Eger ol taza aýyzsý bolsa, tek ishýge, al oǵan jaramsyz bolsa, tehnıkalyq maqsatqa, óndiriske paıdalanýǵa tıispiz. Memleket muny qatań retteýi kerek», - deıdi.
***
«Qazaqstan Prezıdenti Nursultan Nazarbaev qysqa merzimdi demalysy kezinde Izraıl Prezıdenti Shımon Perespen jumys babyndaǵy kezdesý ótkizdi», - dep jazady «Kazahstanskaıa pravda» gazeti. Kezdesý barysynda eki eldiń kóshbasshylary ekonomıka salasyndaǵy ekijaqty yntymaqtastyqty damytý máselelerin talqylady. Sonyń ishinde agroónerkásip kesheni men ınnovatsııalyq tehnologııalar sııaqty negizgi baǵyttar boıynsha ózara is-qımyl jaıy qarastyryldy. Talqylaý nátıjesi boıynsha memleket basshylary eki el arasyndaǵy seriktestik qatynastaryn odan ári nyǵaıtý jáne memleketaralyq yntymaqtastyqtyń aýqymyn keńeıtý qajettigin atap ótti.
***
«Ekspress K» gazetiniń jazýynsha, eń maskúnem elderdiń kúdik týdyrar reıtınginde Qazaqstan óziniń ortaazııalyq kórshileriniń barlyǵyn basyp ozdy. Dúnıejúzilik densaýlyq saqtaý uıymy usynǵan málimetterge qaraǵanda, jasy 15-ten asqan respýblıka turǵyny jylyna orta eseppen 11 lıtr taza alkogol tutynady eken. Tolyǵyraq basylymnyń juma kúngi sanyndaǵy «11 lıtrov na brata» degen maqalada jazylǵan.
