Astanaǵa 700 tonnadan astam aýylsharýashylyq ónimderi ákelindi - I. Tasmaǵambetov
ASTANA. Qazannyń 9-y. QazAqparat /Jasulan Amanbaıuly/ - Elordada «Aýyl bereke» aýylsharýashylyq ónimderiniń jármeńkesi ótýde.
Búgin qala ákimi Imanǵalı Tasmaǵambetovtiń qatysýymen ashylǵan shara bıylǵy maýsymnyń qorytyndy jármeńkesi.
«Shapaǵat» kommýnaldyq bazarynyń aýmaǵynda ashylǵan «Aýyl bereke» jármeńkesine Aqmola oblysynyń fermerlik sharýashylyqtary óz ónimderin qoıǵan. Bunyń aldynda Astanada Pavlodar, Qaraǵandy, Almaty, oblystarynyń jáne Temirtaý men jergilikti jerdiń aýylsharýashylyq kásiporyndary ósirgen jemis-jıdekteri, kókónisteri, óndirgen et-sút ónimderi arzan baǵamen satylǵan edi.
«Maýsymda bolǵan jármeńkelerge 220-ǵa tarta aýylsharýashylyq taýarlaryn shyǵarýshy sýbektiler qatysty. Olar Astanaǵa 700 tonnadan asatyn ónim alyp kelgen. Bul óte joǵary kórsetkish», - dedi ákim.
I. Tasmaǵambetovtiń aıtýynsha, búgingi jármeńkede usynylǵan taýarlar naryqtaǵy baǵalarǵa qaraǵanda, 20-25 paıyzǵa tómen baǵamen satylyp jatyr.
«Qyrkúıek jáne qazan aılarynda jármeńkeler maýsymy kezinde elordaǵa shektes jatqan barlyq oblystardan aýyl sharýashylyq ónimderin óndirýshileri qatysty. Olardyń tarapynan belsendilik óte joǵary, usynylǵan taýarlardyń túrleri óte kóp jáne olardyń naryqtaǵy baǵalarǵa qaraǵanda 20-25 paıyzǵa tómen baǵamen satylýy turǵyndar úshin tartymdy ekendigin aıta ketken jón», - dep atap kórsetti I. Tasmaǵambetov.
Atalmysh sharalar Astana aınalasynda azyq-túlik beldeýin qurý týraly Elbasynyń tapsyrmasy aıasynda uıymdastyryldy.
