Astanaǵa 50-den astam jedel medıtsınalyq járdem kólikteri satyp alynady

ASTANA. QazAqparat - Astanaǵa eki jylda 50-den astam jedel medıtsınalyq járdem kólikteri satyp alynady. Bul týraly búgin QR Premer-Mınıstriniń orynbasary Berdibek Saparbaevtyń qatysýymen ótken «Áleýmettik áleýet - Astana aıbary» atty keńes barysynda Densaýlyq saqtaý jáne áleýmettik damý mınıstri Tamara Dúısenova málim etti.

Aıta keterligi, Astana ákimdigi men Densaýlyq saqtaý jáne áleýmettik damý mınıstrligi arasynda birqatar memorandým jasalǵan bolatyn. Sonyń bir baǵyty elorda turǵyndarynyń densaýlyǵyn jaqsartýǵa arnalyp, halyqqa kórsetiletin medıtsınalyq qyzmettiń sapasyn jáne qoljetimdiligin arttyrýdy qarastyrady.

Mınıstrdiń sózine qaraǵanda, atalmysh memorandým aıasyndaǵy asa mańyzdy baǵyttardyń biri - jedel medıtsınalyq járdem brıgadasynyń úzdiksiz jumys isteýin qamtý. Astana qalasy Densaýlyq saqtaý basqarmasynyń málimetine qaraǵanda, byltyrǵy jyly elordalyq jedel járdem brıgadasy 500 myńnan astam shaqyrtýlarǵa qyzmet kórsetken. Sonyń 43 myńynda jedel kómekter der ýaǵynda júzege aspaǵan bolyp otyr.

«Osy máseleni sheshý úshin biz memorandýmǵa qol qoıyp otyrmyz, al onyń aıasynda aǵymdaǵy jyldyń ózinde jergilikti bıýdjet esebinen sanıtarlyq avtokóliktiń 22 birligi, al kelesi 2016 jyly respýblıkalyq bıýdjet qarajatynan 33 birligi satyp alynbaq», - dedi T.Dúısenova.

Onyń sózine qaraǵanda, 2017 jyldyń 1 qańtaryna deıin Astanada jedel medıtsınalyq kómektiń qalalyq stansasynyń qurylysy aıaqtalady.