Astanaǵa 5 myńnan astam qonaq keledi: AIF elordaǵa qansha tabys ákeledi

ASTANA. KAZINFORM – 29-30 mamyr kúnderi elordada ótetin Astana International Forum (AIF) qatysýshylary kele bastady. Uıymdastyrýshylardyń habarlaýynsha, elordaǵa 5 myńnan astam sheteldik qonaq keledi.

Qonaqtar qatarynda forým qatysýshylary, delegatsııa basshylary men kompanııa jetekshileri jáne 100-den astam sheteldik BAQ ókilderi bar.

Forým uıymdastyrýshylarynyń málimetinshe, qonaqtar qalanyń 37 iri qonaqúıinen bólmeler brondaǵan. 2025 jylǵy 26-31 mamyr aralyǵynda 4 juldyzdy qonaqúıler 50-90% tolǵan, al 5 juldyzdy qonaqúıler 90-100% aralyǵynda tolǵan.

Aıta ketsek, isker týrıstiń bir kúndik ortasha shyǵyny – 177 myń teńge (turý, tamaqtaný, taksı, demalys pen shopıng shyǵyndaryn qosa alǵanda) shamasynda. Orta eseppen qalada 3 kún bolady.

Sheteldik qonaqtardyń kelýi arqyly elorda men tutastaı el úshin bul is-sharanyń jalpy ekonomıkalyq áseri 2,6 mıllıard teńgeden asady dep baǵalanǵan.

Aıta keteıik, Túrki elderiniń ortalyq bankter keńesiniń alǵashqy otyrysy Astana halyqaralyq forýmy aıasynda ótedi.