Astanaǵa 450 avtobýs satyp alynbaq
ASTANA. QazAqparat - Bolashaqta Astanaǵa 450 avtobýs satyp alý josparlanǵan. Bul týraly búgin ótken baspasóz máslıhatynda Astana qalasy ákiminiń orynbasary Qanat Sultanbekov málimdedi.
Onyń málimetinshe, búginde Astanadaǵy qoǵamdyq kólikter 750 myń jolaýshyny tasymaldaıdy. Bul - turǵyndardyń 33 paıyzy. Ákimdik 2016 jylǵa deıin bul kórsetkishti 970 myńǵa, ıaǵnı 47 paıyzǵa jetkizýdi josparlap otyr.
«Ol úshin jańa marshrýttyq júıe engizý kerek. Osy maqsatta eýropalyq «Typsa» kompanııasynyń jobasy synaq túrinde engizilgen bolatyn. Budan bólek, bıyl IVECO markaly 350 jańa avtobýs jetkizý jóninde kelisimge qol qoıyldy. Olardyń barlyǵy gazben júretin bolady. Jyldyń sońyna deıin taǵy 100 avtobýs satyp alý josparlanyp otyr», - deıdi Q. Sultanbekov.
Ákim orynbasarynyń málimetinshe, qoǵamdyq kólikterdiń jumysyn qadaǵalaý úshin 2 kommýnaldyq park salynady.
«Alǵashqy parktiń qurylysy aǵymdaǵy jyldyń mamyr aıynda qolǵa alynyp, tamyzda qoldanysqa beriledi. Ekinshi avtopark bıylǵy jyldyń ekinshi jartysynda bastalyp, 2015 jyldyń sáýir aıynda tapsyrylady», - dep atap ótti ol.
Sondaı-aq, Q. Sultanbekovtiń aıtýynsha, júrgizýshilerdiń biliktiligin arttyrý maqsatynda arnaıy ortalyq qurylyp, ol 30 sáýirden bastap qyzmetine kirisedi.
