Astanaǵa 3 keli mefedron jetkizbek bolǵan eki adam ustaldy
ASTANA. KAZINFORM — Astanaǵa esirtkiniń iri partııasyn jetkizýge áreket jasaǵan 20 jastaǵy er adam men 18 jastaǵy qyz ustaldy.
Jedel-izdestirý is-sharalary barysynda polıtsııa kúdiktiler otyrǵan KIA kóligin elordaǵa kireberistegi beketterdiń birinde toqtatqan. Kólikti tintý kezinde eki vakýýmdalǵan paket salynǵan qorap tabyldy. Paketterden aq tústi untaq tárizdi zat tárkilendi. Saraptama onyń mefedron ekenin kórsetti. Jalpy salmaǵy — 2 keli.
Keıin kúdiktiler turǵan páter tintilip, taǵy 1 kelige jýyq osyndaı zat, sondaı-aq ony ólshep, oraýǵa arnalǵan zattar tabyldy.
Jalpy salmaǵy 3 keliden asatyn zattaı dáleldemeler tárkilendi. Osy fakti boıynsha qylmystyq is qozǵalyp, eki kúdikti de ýaqytsha ustaý ızolıatoryna qamaldy.
Polıtsııa esirtkini jetkizý jáne taratý arnalarynyń jolyn anyqtaý ári kesý boıynsha jumysty jalǵastyryp jatyr.
Eske salaıyq, buǵan deıin Shý qalasynda aýlasyna esirtki jasyrǵan turǵyn ustalǵanyn jazǵanbyz.
