Astanaǵa 2014 jyly 642 myńnan astam týrıst keldi
ASTANA. QazAqparat - El ordasy - Astana 17 jyldyń ishinde elimizdiń iri týrıstik ortalyǵyna aınaldy. 2014 jyly qalaǵa 642,1 myń týrıst kelgen, sonyń ishinde elge kelýshiler týrızminiń jelisi boıynsha - 145,5 myń týrıst, ishki týrızm jelisi boıynsha - 440,9 myń týrıst, dep habarlady Astana qalasynyń resmı saıty.
Sońǵy jyldary kiris týrızmi arqyly Astanaǵa kelgen týrıster sany artyp keledi: 2011 jylǵy 105,9 myń adamnan, 2014 jyly 145,5 myń adamǵa deıin. Іshki týrızmniń úles salmaǵy da 2011 jylǵy 373,5 myń adamnan 2014 jyly 440,9 myń adamǵa deıin ósken.
Astana qalasy Týrızm, dene shynyqtyrý jáne sport basqarmasynyń habarlaýynsha, qalada 297 týrıstik fırma jumys isteıdi. Negizinen, olar taıaý jáne qıyr shet elderde elordalyqtardyń demalysyn uıymdastyryp, elden ketýshiler týrızmimen aınalysady, týrıstik fırmalardyń basym bóliginiń avıakassalary, keıde temirjol kassalary bolady.
Elge kelýshiler týrızmi boıynsha týrıstik qyzmetter naryǵynda negizinen shetel azamattaryn vızalyq qoldaý, qonaq úıge deıingi transfertter jáne aýdarmashy qyzmeti usynylady. Birneshe shet tilderinde ekskýrsııa uıymdastyrý, avtomobıldi jalǵa alý qyzmeti de keńinen tarap otyr.
«Astana - meniń Otanymnyń elordasy» keń aýqymdy áleýmettik jobasy jyl saıyn júzege asyrylady. Joba aıasynda Qazaqstannyń óńirlerinen 500 bala elordaǵa keledi. Atap aıtqanda, halyqtyń áleýmettik osal toptaryna jatatyn balalar, oqý men sport ozattary. Eki kúndik tanymdyq, oıyn-saýyq baǵdarlamasyna elordanyń kórikti jerlerin aralaý kiredi. «Kochevnık» týrıstik kompanııasymen birlese «Astana Bus Tours» jobasynyń eki qabatty qyzyl avtoýbstarymen qala boıynsha ekskýrsııa uıymastyryldy. Astana qalasy Týrızm, dene shynyqtyrý jáne sport basqarmasy qalanyń týrıstik ımıdjin jyljytý maqsatynda Qazaqstan Respýblıkasynyń resmı delegatsııasynyń quramynda London, Madrıd, Ystambul, Máskeý, Berlın, Gonkong, Dýbaı qalalarynda ótken halyqaralyq kórmelerge qatysty.
