«Astanaenergoservıs» AQ elorda aspanyn tútin tumshalaýynyń sebebin túsindirdi
ASTANA. QazAqparat - «Astanaenergoservıs» AQ elordanyń aspanyn basyp turǵan tútinge Jylý elektr ortalyǵynyń qatysy joq degen paıymǵa kelip otyr, dep habarlaıdy «QazAqparat» HAA tilshisi kompanııanyń baspasóz qyzmetine silteme jasap.
Búgingi tańda Astanada eń kóp talqylanyp jatqan taqyryptardyń biri - Astana aspanyn basqan tútinniń paıda bolýy. «Astanaenergoservıs» AQ baspasóz qyzmeti tútindi tuman - tútinnen, tumannan jáne shańnan kóterilgen aerozol ekenin, jelsiz kúnderi kók tútin shahardyń kóshelerin basyp qalatynyn habarlaıdy.
«Jylý elektr ortalyǵynyń qubyrynan shyǵatyn tútin «tútin búrkeýinen» aıtarlyqtaı joǵary ornalasqan. Jylý elektr ortalyǵynyń joǵary bıiktikte ornalasqan (100, 120,150,180 metr) qubyrlarynan shyqqan tútin gaz aǵymynyń joǵary jyldamdyǵynyń arqasynda tarap ketetindikten, qalany tútinniń basyp ketýine olardyń (JEO-lardyń) qatysy joq», - delingen habarlamada.
«Astanaenergoservıs» AQ baspasóz qyzmetiniń aqparatyna sensek, JEO-2 gradırnıasynan shyǵatyn sý býynyń býdaǵyn keıbireýler tútinmen shatastyratyn kórinedi. Aıta keterligi, gradırnıa - atmosferalyq aýa aǵynymen baǵyttalǵan tehnologııalyq protsesste sýdyń aýqymdy mólsherin salqyndatýǵa arnalǵan qondyrǵy. Keıde gradırnıany «salqyndatqysh munara» dep te ataıdy. Ásirese, aıaz túsken kezde sý býy anyq baıqala túsedi.
«Bý qondyrǵylarynda ystyq sýdy salqyndatýǵa arnalǵan munara túrindegi tońazytqyshtyń býdaǵy qorshaǵan ortaǵa zııan keltirmeıdi. Aı saıyn Astana qalasynyń JEO-1 jáne JEO-2 kásiporyndarynda atmosferany lastaýshy bólinisterdiń zerthanalyq monıtorıngi júrgiziledi. Sondaı-aq, stantsııadaǵy qazandyq arregattary statsıonarly kózderden shyǵatyn shyǵaryndylarǵa turaqty ári avtomatty túrde baqylaý júrgizetin júıelermen jabdyqtalǵan. Monıtorıngtiń málimetteri standarttarǵa sáıkestikti rastaıdy. Jyl saıyn «Astana-Energııa» AQ atmosferaǵa lastaýshy bólinisterdi azaıtý boıynsha tıimdi sharalardy josparly túrde oryndaýda», - deıdi «Astanaenergoservıs» AQ-nan.
Kompanııa óziniń habarlamasynda, Astana qalasynda qazirgi tańda jeke sektor turǵyndarynyń kóp bóligi ot jaǵyp, úıin jylytyp otyrǵandyqtan «tútin búrkeýi» paıda bolyp otyrǵanyn habarlaıdy.
«Budan basqa, iri qalalarda aýanyń lastanýynyń sebebi fotohımııalyq tútin bolyp tabylady. Ol avtokólikter sanynyń kóbeıýimen tikeleı baılanysty», - dep habarlaıdy kompanııanyń baspasóz qyzmeti.
