«Astanaenergosbyt» kompanııasyna 4,6 mln teńge aıyppul salyndy
Elorda turǵyndary men kásipkerlik sýbektileriniń ótinishi boıynsha, Tabıǵı monopolııalardy retteý komıtetiniń Nur-Sultan qalasy boıynsha departamenti «Astanaenergosbyt» JShS-na qatysty tabıǵı monopolııalar salasyndaǵy zańnamasynyń talaptaryn saqtalý turǵysynan jospardan tys tekserý júrgizdi.
Tekserý barysynda, «Astanaenergosbyt» JShS-nyń «jeke tulǵalar» sanaty boıynsha jańadan engizilgen turǵyn úıler boıynsha jylý energııasynyń kólemin qabyldamaıtyny anyqtaldy, osylaısha qurylys salýshy obektilerdi tapsyrǵan kezde jeke tulǵalarǵa jylýmen jabdyqtaýǵa jeke shot ashýdan bas tartady.
«Obektiniń menshik ıesi aýysqan jaǵdaıda, qurylys salýshy «Astanaenergosbyt» JShS-men energııamen jabdyqtaý shartyn buzǵan kezde jáne jańa menshik ıelerine jeke shottar ashpaı, bul obekt kelisimshartsyz sanatqa ótedi.
Sonymen qatar, «Astanaenergosbyt» kompanııasy 25-shi kóshe 9-úı, A. Hrapatyı kóshesi 14, Dostyq 1/2, E67 kóshesi 6-úı, Qabanbaı batyr 49, Qarasaı batyr 22/A, 22/B, Qazybek bı 11A, Q. Muhamedhanov 1/1, Q. Muhamedhanov 1/2. Q. Muhamedhanov 20, q. Muhamedhanov 20/1, q. Muhamedhanov 20/2, Q. Muhamedhanov 20/2, Kereı, Jánibek handar 50, Máńgilik el dańǵyly 45, 58, Turan dańǵyly 58-úı jáne jalpy 1 191 páter boıynsha jalpy 3027,72 Gkal kóleminde jylý energııasy qabyldamaǵan jáne shart jasasýdan bas tartqan», delingen habarlamada.
«Astanaenergosbyt» kompanııasy jylý energııasymen jabdyqtaý salasyndaǵy tabıǵı monopolııa sýbektisi bola otyryp, jeke tulǵalarǵa jeke shot ashýdan jáne jylý energııasynyń kólemin qabyldaýdan bas tartý arqyly tutynýshylar úshin jylýmen jabdyqtaý qyzmetine qol jetkizýdiń teń emes jaǵdaıyn jasaǵan.
«Joǵaryda atalǵan áreketpen «Astanaenergosbyt» JShS «Tabıǵı monopolııalar týraly» Zańynyń 26-baby 2-tarmaǵynyń 5), 8) tarmaqshalaryn buzdy, oǵan sáıkes tabıǵı monopolııa sýbektisi tutynýshylarǵa rettelip kórsetiletin qyzmetke qoljetimdiliktiń teń jaǵdaılaryn usynýǵa, usynylatyn rettelip kórsetiletin qyzmetterdiń árbir túrine tutynýshylarmen jeke sharttar jasasýǵa mindetti.
Jospardan tys tekserý qorytyndysy boıynsha «Astanaenergosbyt» JShS- Ákimshilik quqyq buzýshylyq týraly kodeksiniń 164-babynyń 4-bóligi boıynsha ákimshilik jaýapkershilikke tartylyp, oǵan 4 667 200 teńge kóleminde aıyppul salyndy», delingen habarlamada.
Sonymen qatar, kompanııaǵa joǵaryda kórsetilgen turǵyn úıler boıynsha jeke tulǵalarmen on kún ishinde shart jasasý týraly oryndalýy mindetti nusqama berildi.
