«Astanaenergosbyt» elektr tarıfin 7 paıyzǵa kóterýdi surap otyr
NUR-SULTAN. QazAqparat – Nur-Sultan qalasyn jylý jáne elektr energııasymen ókiletti organnyń retteýi arqyly jabdyqtaıtyn «Astanaenergosbyt» kompanııasy elektr qýatynyń bólshek saýdadaǵy tarıfin 7 paıyzǵa ósirýdi surap júr. Búgin qalalyq Tabıǵı monopolııalardy retteý departamentinde osy máselege baılanysty qoǵamdyq tyńdaý ótti, dep habarlaıdy QazAqparat tilshisi.
Bólshek saýdadaǵy elektr tarıfin kóterý týraly usynystyń neden paıda bolǵanyn «Astanaenergosbyt» JShS bas dırektorynyń ekonomıka jáne qarjy jónindegi orynbasary Janna Gısler túsindirdi.
Onyń málimeti boıynsha, shekti baǵany ulǵaıtý týraly ótinishpen shyǵýǵa mynadaı faktorlar sebep bolǵan:
- energııa berýshi uıymdar tarıfteriniń ósýi;
- jańartylatyn energııa kózderin qoldaýǵa ústemeaqynyń ósýi;
- elektr qýatynyń daıyndyǵyn qamtamasyz etý boıynsha qyzmet qunynyń ósýi;
- 2021 jylǵa saralanǵan tarıfterdi qoldanýdan alynbaǵan kiris;
- 2020-2021 jyldarda elektr energııasy mne qýattardy satyp alý jáne tasymaldaý boıynsha bekitilgen baǵa men naqty baǵanyń aıyrmashylyǵyna baılanysty týyndaǵan shyǵyndar.
Janna Gısler atalǵan ár sebepke qysqasha toqtalyp ótti. Aıtýynsha, bıyl 1 qyrkúıekten bastap 1 KVt/saǵ elektr qýatyn tutynǵany úshin alynatyn tólemniń shekti tarıfi 19,84 teńge bolyp bekitilgen. Kásiporyn endi sony 21,13 teńgege deıin kóterýdi surap otyr. ıAǵnı, ósim orta eseppen 7% nemese +1,29 teńge bolady degen sóz.
«Birinshiden, elektr energııasyn satyp alýdyń ortasha baǵasy 1 KVt/saǵ energııa úshin 0,03 teńgege nemese 0,04% qymbattady. Al jańartylatyn energııa kózderin qoldaýǵa arnalǵan ústemeaqy tarıfi 1,57 teńgeden 1,58 teńgege nemese 0,6% ósti. Tek elektr energııasyn óndirýdiń shekti tarıfteri ózgerissiz qaldy. Ekinshiden, elektr qýatynyń daıyndyǵyn qamtamasyz etý qyzmetteriniń quny 3% nemese 1 MVt elektr qýaty úshin 692,3 myń teńgeden 711,4 myń teńgege deıin ósti. Úshinshiden, energııa berýshi uıymdar tarıfti ósirip, sonyń áserinen tasymaldaý tarıfi orta eseppen 1 KVt/saǵ energııa úshin 0,63 teńgege nemese 8% qymbattady», - dedi «Astanaenergosbyt» kompanııasynyń ókili.
Jalpy málimetten jalqyǵa oıyssaq, mynadaı ahýal qalyptasyp otyr. Elektr jelilerine qyzmet kórsetetin «Astana-AEK» AQ tarıfi 1 KVt/saǵ energııa úshin 6% nemese 4,23 teńgeden 4,50 teńgege deıin ósirgen. Al «Aqmola elektrojelilik úlestirý kompanııasy» AQ tarıfin 6% nemese 5,08-den 5,36 teńgege deıin kótergen.
«KEGOK» AQ tarıfi 15% nemes 2,448-den 2,811 teńgege deıin artqan.
Teńgerimdeýshi elektr energııasynyń shekti tarıfi 19% nemese 0,086-dan 0,102 teńgege ósken.
«Tutynýshylardan paıdalanǵan energııanyń kólemine baılanysty bekitilgen saralanǵan tarıf boıynsha 2021 jyly qosymsha 495,7 mln teńgeniń kirisi alynbaı qaldy. Al elektr energııasyn satyp alý jáne tasymaldaý boıynsha bekitilgen baǵa men naryqta naqty qalyptasqan baǵanyń aıyrmashylyǵynan 884,9 myń teńge shyǵyn keldi. Bul jerde 2018-2020 jyldar aralyǵyndaǵy shyǵyndy aıtyp otyrmyz», - dedi Janna Gısler.
Osylardy alǵa tartqan «Astanaenergosbyt» kompanııasy saralanǵan tarıfti 2022 jyldyń qańtarynan bastap mynadaı kólemde bekitýdi usynyp otyr:
- qarapaıym turǵyndar úshin 1 KVt/saǵ elektr energııasynyń qunyn 14,54 teńge etý (+7%);
- bıýdjettik uıymdardan basqa zańdy tulǵalar úshin 21,13 teńge etý (-6%);
Bıýdjettik uıymdar úshin 85,89 teńge etý (+35,89 teńge).
Nur-Sultan qalasy Tabıǵı monopolııalardy retteý departamentiniń basshysy Bolat Tanabergenov atalǵan ótinim boıynsha naqty sheshim áli shyqpaıtynyn eskertti.
«1 qyrkúıekten bastap «Astanaenergosbyt» kásipornyna 19 teńge 80 tıyn shekti tarıf bekitilgen. Ony 2022 jyldyń 1 qańtardan bastap 6,5 paıyz kóterýdi surap otyr. Ótinim qaralýda. Jańa jyldan bastap tarıf ósedi dep naqty aıta almaımyz. Naqty sheshim jyl aıaǵyna deıin qabyldanady. Búgingi talqylaýda aıtylǵan eskertýler men usynystardyń bári sheshim shyǵarar kezde eskeriledi», - dedi departament basshysy.
Nur-Sultan qalasynyń aýmaǵynda «Astanaenergosbyt» JShS-dan basqa 10-nan astam energııa ótkizý kompanııasy jumys isteıdi. Biraq olardyń qyzmetin tabıǵı monopolııalardy retteý organy rettemeıdi. Degenmen, memleket «Astanaenergosbyt» JShS-nyń tarıfin retteý arqyly jalpy naryqtaǵy baǵany baqylap otyr deýge bolady.
