Astanadan Túmen, Batýmı, Tomsk qalalaryna turaqty reıster ashylady
ASTANA. QazAqparat - Qazaqstanda Astanadan Túmen, Batýmı, Tomsk jáne ózge de qalalarǵa turaqty reıster ashylady. Bul týraly QR Investıtsııalar jáne damý mınıstri Jeńis Qasymbek «Kazahstanskaıa pravda» gazetine bergen suhbatynda habarlady.
«2018 jyly qazaqstandyq áýe kompanııalary Astanadan Túmen, Krasnodar, Vılnıýs, Tomsk, Chelıabi, Sochı, Batýmı, Dýshanbe qalalaryna turaqty reıster ashýdy josparlap otyr. Sheteldik kompanııalar (Air Baltic, Emirates, Fly Dubai, «Angara», «Aeroflot») Rıga - Almaty, Dýbaı - Almaty, Dýbaı - Aqtaý, Krasnoıarsk - Almaty, Máskeý - Qyzylorda baǵyttary boıynsha turaqty reıster júrgizedi», - dedi mınıstr.
Al 2020 jyly Sıngapýr, Tokıo jáne Shanhaıǵa reıs ashý josparlanyp otyr.
Mınıstrdiń aıtýynsha, búginde elimizde 96 baǵyt boıynsha halyqaralyq reıster júzege asyrylady. Máselen, 2016 jyly Almatydan Sıan, Sanıa, Sharm-El-Sheıh, Tegeran jáne Samara qalalaryna, Astanadan Amsterdam, Sanıaǵa, Aqtaýdan Batýmı jáne Sochıge, Shymkentten Ystanbul jáne Hýdjand, Qaraǵandydan Ystanbulǵa, Tarazdan Nıjnevartovsk, Sýrgýt jáne Hýdjand qalalaryna 15 jańa baǵyt ashylǵan.
Qazaqstan astanasy men álemdegi jetekshi qarjylyq ortalyqtar arasynda tikeleı áýe qatynasyn qamtamasyz etý maqsatynda respýblıkanyń áýe tasymaldary naryǵyn kezeń-kezeńimen yryqtandyrý jumysy júrgizilip jatyr. Astanaǵa Varshavadan LOT áýe kompanııasynyń, Býdapeshtten - Wizzair áýe kompanııasynyń, Helsınkıden - Finnair jáne Batýmıden - Georgian Airways grýzııalyq áýe kompanııasynyń reısteri ashyldy. Sondaı-aq, qazaqstandyq áýe tasymaldaýshylary Kıev, Mınvody, Erevan, Delı baǵyttary boıynsha jańa reıster ashty, dep jazdy basylym.
