Astanadan Taldyqorǵanǵa jańa poıyz qatynaıdy
ASTANA. KAZINFORM — QR Kólik mınıstrligi «Astana — Taldyqorǵan» baǵyty boıynsha jańa temirjol qatynasynyń iske qosylatyny týraly habarlaıdy.
Jańa baǵytty ashý QR Parlamenti Májilisiniń depýtattarynyń bastamasymen, Kólik mınıstrligi jáne Ulttyq tasymaldaýshy — «Jolaýshylar tasymaly» AQ-nyń birlesken jumysy aıasynda, sondaı-aq azamattardyń kóptegen ótinishi eskerile otyryp júzege asyryldy.
Atalǵan baǵytty iske qosý Jetisý oblysynyń kólik qoljetimdiligin arttyrýǵa, jolaýshylar suranysynyń ósýin qamtamasyz etýge, sondaı-aq elorda men óńirler arasynda jaıly, qaýipsiz jáne turaqty temirjol qatynasyn qalyptastyrýǵa baǵyttalǵan.
Bastapqy kezeńde ulttyq tasymaldaýshy tarapynan eki jolaýshylar vagony bólinip, olar № 122/121 «Nurly jol — Semeı» poıyzynyń quramynda kún ara qatynaıtyn bolady. Aqtoǵaı stantsııasynda atalǵan vagondardy № 631/632 «Aqtoǵaı — Taldyqorǵan» poıyzyna qaıta tirkeý kózdelgen, bul búkil marshrýt boıymen úzdiksiz ári yńǵaıly qatynasty qamtamasyz etedi.
Kólik mınıstrligi bul format bastapqy kezeń ekenin atap ótedi. Turaqty jolaýshylar suranysy qalyptasqan jaǵdaıda vagondar sany men qatynaý jıiligi kezeń-kezeńimen ulǵaıtylatyn bolady, bul marshrýtty halyqtyń qajettilikterine ıkemdi túrde beıimdeýge múmkindik beredi.
Jańa temirjol qatynasynyń ashylýy:
• óńirler arasyndaǵy áleýmettik-ekonomıkalyq baılanystardy nyǵaıtýǵa;
• turǵyndardyń mobıldiligin arttyrýǵa;
• ishki týrızm men iskerlik belsendilikti damytýǵa;
• Jetisý oblysynyń týrıstik tartymdylyǵyn arttyrýǵa yqpal etedi.
Poıyzdyń qatynaýy bıylǵy jyldyń sáýir aıyna josparlanǵan jáne Taldyqorǵan qalasyndaǵy jańǵyrtylǵan temirjol vokzalynyń saltanatty ashylýyna oraılastyrylady.
Jańartylǵan vokzal ınfraqurylymy jolaýshylar úshin qyzmet kórsetý, jaılylyq jáne qaýipsizdik deńgeıin arttyrýdy qamtamasyz etedi.
Kólik mınıstrligi Memleket basshysynyń tapsyrmalary men kólik salasynyń strategııalyq basymdyqtaryna sáıkes jolaýshylar tasymalynyń marshrýttyq jelisin damytý, jyljymaly quramdy jańǵyrtý jáne kólik qyzmetteriniń sapasyn arttyrý boıynsha júıeli jumysty jalǵastyady.
Buǵan deıin Úkimet Qazaqstannyń kólik salasyndaǵy 2025 jylǵy nátıjelerdi jarııa etkenin jazǵanbyz.