Astanadan Taldyqorǵanǵa 3,6 keli psıhotroptyq zat jetkizbek bolǵan kúdikti ustaldy
ASTANA. KAZINFORM — Astana qalasynda polıtsııa qyzmetkerleri Taldyqorǵanǵa jetkizýge arnalǵan 3 keliden astam psıhotroptyq zatty tárkiledi. Zańsyz tasymaldaýǵa kúdikti 32 jastaǵy er adam ustalyp, qamaýǵa alyndy. Bul týraly Polisia.kz jazdy.
Jetisý oblysy polıtsııa departamentiniń esirtki qylmysyna qarsy is-qımyl basqarmasynyń qyzmetkerleri Іshki ister mınıstrligi jáne Astana qalasy polıtsııa departamentiniń qyzmetkerlerimen birlesip, Jetisý oblysy prokýratýrasynyń úılestirýimen elordadan Taldyqorǵan qalasyna iri kólemde psıhotroptyq zattardy jetkizý arnasynyń jolyn kesti.
Jedel-izdestirý is-sharalary barysynda polıtsııa qyzmetkerlerine tyıym salynǵan zattardyń jetkiziletini týraly aqparat túsken. Keıingi jedel jumystar nátıjesinde zańsyz tasymaldaýǵa qatysy bar adamdar men onyń mán-jaılary anyqtaldy. Astana qalasynda polıtsııa qyzmetkerleri Taraz qalasynyń týmasy, 32 jastaǵy er adam basqarǵan Geely avtokóligin toqtatty.
— Kólikti tintý barysynda artqy jolaýshylar oryndyǵynyń tysy astynan untaq tárizdi zaty bar eki orama tabyldy. Tergeý barysynda 2 keli 148 gramm mefedron jáne 506 gramm α-PVP psıhotroptyq zaty tárkilendi. Alaıda jedel jumys munymen aıaqtalǵan joq, — dep habarlady ІІM—nen.
Keıingi is-sharalar barysynda ustalǵan azamat kinásin moıyndap, odan ári taratýǵa arnalǵan psıhotroptyq zat jasyrylǵan oryndy kórsetti. Kórsetilgen aýmaqty tekserý kezinde polıtsııa qyzmetkerleri taǵy 992 gramm α-PVP psıhotroptyq zaty salynǵan oramany anyqtady. Osylaısha, zańsyz aınalymnan jalpy salmaǵy 3 keli 646 gramm psıhotroptyq zat tárkilendi.
Atalǵan zattar odan ári taratýǵa arnalǵan. Atalǵan derek boıynsha sotqa deıingi tergep-tekserý júrgizilýde. Kúdikti qamaýda otyr. Polıtsııa óńirge esirtki jáne psıhotroptyq zattardy jetkizý arnalarynyń jolyn kesý baǵytyndaǵy jumystardy júıeli túrde jalǵastyrady.
Buǵan deıin Astanada Telegram arqyly esirtki satqan top músheleri sottalǵanyn jazdyq.
