Astanadan shyǵatyn tasjoldar jabyq
ASTANA. QazAqparat – Astana qalasynyń Tótenshe jaǵdaılar departamenti kún raıyna baılanysty elordadan shyǵatyn tasjoldardyń jabylǵanyn málimdedi, dep habarlaıdy QazAqparat.
«Búgin saǵat 10:00-den bastap aýa raıynyń nasharlaýyna baılanysty (qatty jel, qarly boran) kólik quraldarynyń barlyq túrleri úshin respýblıkalyq mańyzy bar avtojoldardaǵy kólik qozǵalysy toqtatyldy: «Ekaterınbýrg-Almaty» avtojolynyń 1291-1353 shaqyrymy (Astanadan – Anar stansasyna deıin), «Astana-Qorǵaljyń» avtojolynyń 19-124 shaqyrymy (Astana-Qorǵaljyń), «Astana-Qabanbaı Batyra-Kıevka-Nura-Temirtaý» avtojoly 16-51 shaqyrymy (Qosshy-Qaraǵandy oblysy)», - dep habarlady TJD.
Buǵan deıin habarlaǵanymyzdaı, kún raıynyń qolaısyzdyǵyna jáne trassalardyń jabylýyna baılanysty qala mańyna qatynaıtyn birneshe baǵytta avtobýstar qozǵalysy ýaqytsha toqtatyldy.
