Astanadan Oralǵa kelýi tıis ushaq Aqtóbege qondy

Qolaısyz aýa raıyna baılanysty Astanadan Oralǵa kelýi tıis ushaq Aqtóbege qondy, dep habarlaıdy Kazinform. 

«Oral halyqaralyq áýejaıy» JShS baspasóz qyzmetinen málim etkenindeı, Eır Astana ushaǵy tańmen Oralǵa kelip, odan Frankfýrt qalasyna ushýy kerek edi.

«20 jeltoqsan kúni Oral qalasynda jańbyr jaýyp, aýa temperatýrasy -1 gradýsqa deıin tómendedi. Oǵan qosa jeldiń ekpini sekýndyna 15-20 metrge jetedi. Bul tabıǵı qubylys ushý qaýipsizdigine teris áser etedi, óıtkeni jaýyn-shashyn saldarynan muz qabyǵy tez paıda bolady. Jaýyn-shashyn bastalǵannan beri áýe aılaǵynda muzǵa qarsy reagent qoldanylýda. Atalǵan reıs jýyq arada Oralǵa kelýi tıis», - dep habarlady.

«Aqtóbe qalasyna Oral ýaqytymen saǵat 08.46 shamasynda qondyq. Bizge pılot «Oralda qar aralas jańbyr bolǵandyqtan qonatyn jolaq qabyldaı almaıdy, sondyqtan áýejaıdy eki saǵatqa japqan» dedi. Qazir Aqtóbe áýejaıynda habar kútip otyrmyz», - dedi Astanadan Oralǵa kele jatqan Dana esimdi jolaýshy.

Eske sala keteıik, budan buryn qolaısyz aýa raıyna baılanysty Oralǵa keletin ushaqtar keıinge qaldyrylǵanyn jazǵan bolatynbyz.